Pakistan prime minister hlui, Imran Khan chu Thawhlehni khan an khawpui, Islamabad-a high court tualah man a ni.
Khan-a hi ei ruk thubuai a neih mek chungchangah court-ah hian a inlan a, a thubuai hi politics thil avanga an siamsak mai mai niin a sawi ve thung.
Video thehdarhah chuan Khan-a hi paramilitary force-ten ralthuam keng chi phurtu hmangin court compound a luh rualin an lo man a, an tlan chhuahpui nghal a ni.
Nikum April thla prime minister a nihna atangin paih thlak a ni a, hemi hnuah hian inthlanpui buatsaih a nih hma theih nan nasa takin a tlangau zui.
Inthlanpui hi kumin kum tawp lama neih tur a ni.
Punjab police inspector-general chuan Khan-a hi ‘eirukna leh eirukna thil ti’-a puh a nih avanga man a nih thu a sawi.
Dawn chanchinbu chuan a thubuai zingah hian amah leh a nupuite ta, Al-Qadir Trust-in ram an neih ngawt dan pawh a dik lo nia puhna a tel tih an tar lang.
Khan chuan engmah dan bawhchhiaa thiltih a nei lo tih a sawi.
Islamabad pana a kal kawnga video message a siam, a kaihhruai Pakistan Tehreek-e-Insaf (PTI) party-in an man hma lawkah an tihchhuahah Khan-a hian a hmaa lo thleng tur chu huai taka panin a inpeih vek tih a sawi.
“Warrant-te nen lo kal ula, ka dan hre mite an lo awm ang,” a ti a. “Lung ina min dah duh a nih chuan ka inpeih vek e,” a ti bawk.
PTI chuan an mite chu khawlaiah an hotupa ber man duh lohna lantir turin an ko khawm a, Lahore leh Peshawar-ah chuan an pung khawm nghal a. Islamabad laili-ah erawh chuan court-a prime minister hlui a inlan dawn avangin venhimna khauh taka kalpui a ni thung.