Kum 2020 khan he chawimawina hi lo dawngdun tawhin, kuminah a vawihnihna atan a dawng nawn leh a, football khawvela Lionel Messi thangchhuah thawm a rin belh zel.
Argentina World Cup winning captain Messi hian nikum Qatar ram 2022 World Cup trophy hawntu Argentina men’s football team aiawhin World Team of the Year lawmman a dawng tel nghal bawk.
Khawvel infiamna huanga chawimawina ngaihhlut hlawh dawng thei turin Argentina chuan 2022 World Cup final hun pangngaia France nen sithum ve ve thuna an inhnehtawk hnu penalty petah an chak.
Team of the year dawng thei tura chhawpchhuah ve dang – Euro 2022 title latu England hmeichhe football team (Lionesses), men’s Champions League winners Real Madrid leh France men’s Six Nations champion-te an hmakhalh.
Kum 35 mi Paris St Germain forward Messi hi kum khata World Sportsman of the Year Award leh World Team of the Year Award dawngkaqwp thei hmasaber a ni nghal.
Chawimawina a dawn lawmna thu a sawiah Argentine chuan, “Ka hmaa Laureus Sportsman of the Year Award lo dawng tawh mihruai kal hmasa – Schumacher, Woods, Nadal, Federer, Bolt, Hamilton leh Djokovic tihte nen bawm khata khungho ka ni ve hi ka awih lo hial zawk a ni.
“Hei hi ka tan chawimawina hlu leh danglam bik a ni. Kumin phei chu Laureus World Sports Awards hi Paris khuaa semchhuah niin, he khawpui hi kum 2021-a kei leh ka chhungte min lo welcome-tu an ni.
“National team mai ni lo PSG-a ka team-mate zawng zawngte chungah lawmthu ka sawi a, he chawimawina hi keima ngawt chuan ka dawng dawn hauh lo a, anni vanga dawng thei ka ni avangin ka khelhpuite nena engkim intawm zel hi ka hawi lam a ni lo thei lo”,” a ti.
Thawhtanni zana award sem inkhawmah Jamaican sprint champion Shelly-Ann Fraser-Pryce chuan hmeichhe award sang ber a dawng ve thung.
Sportswoman of the year atana thlanchhuah Fraser-Pryce hi nikum khan a chungnung hle a, a hlawhtlinna langsar zingah July thla Oregon lama World Athletics Championship-a 100m gold a lak kha telin, he championship individual track event-a gold medal panga la tling thei awmchhun a ni nghe nghe.
Kum 36 mi Shelly-Ann Fraser-Pryce hian relay race telin outdoor world sprint title 10 a la tling tawh a; kum 13 kalta daih tawh khan a vawikhatna atan 100m gold a lo hlawhchhuak tawh a, khawvel infiammite zingah world sprint title rut hnem ber a ni mek.
Chutiang mi chuan tun hi he category-a award dawng thei tura chhawpchhuah a nih vawirukna a nih thu leh hmeichhe athlete phurawm ber berte nena nominee an niho ngawt pawh phurawm a tih tawh laia khawvela hmeichhia leh mipa infiammi ropui ber ber ni kumkhuate’n award dawng tura an thlangchhuak ta mai mak a tih thu a tarlang tel.
Men’s tennis world number two ni mek Carlos Alcaraz chuan ATP ranking-a number one naupang ber a nih phahna 2022 US Open title a sualchhuah hlawkpuiin Laureus World Breakthrough of the Year a dawng.
European Championship khelh laia lung lam fel lo avanga khelmual chhunga nikhaw hre loa tlu Manchester United leh Denmark midfielder Christian Eriksen chuan a taksa lama harsatna lian tak a tawh hnuah khelmual lut lehin, Premier League football club Brentford tana a inlan leh theih hnuah Manchester United a zawm zui ta hial a, Laureus World Comeback of the Year Award hlan a ni.
Catherine Debrunner kutah Laureus World Sportsperson of the Year with a Disability 2023 award a lut ve bawk.
Laureus Sport for Good award tih chu category pahnih niin, Barcelona leh Ploand striker Robert Lewandowski huaihawta indonain a tihbuai naupangte tanpuina programme duanchhuan “TeamUp” an tih chuan an dawng.
Laureus World Sports Awards nominee-te hi khawvel huap media-te thlanchhuah niin, he list atang hian Laureus World Sports Academy member 71-in chawimawina dawng tur bik an thlangchhuak leh ta thin a; member-te hi sport huanga miropui thlankhawm niin, award-te hi kum 2000 atang khan kumtin semchhuah thin a ni.
Award hrang hrang dawngtute chu:-
World Sportsman of the Year Award: Lionel Messi
World Sportswoman of the Year Award: Shelly-Ann Fraser-Pryce
World Team of the Year Award: Argentina Men’s Football Team
World Breakthrough of the Year Award: Carlos Alcaraz
World Comeback of the Year Award: Christian Eriksen
World Sportsperson of the Year with a Disability Award: Catherine Debrunner
World Action Sportsperson of the Year Award: Eileen Gu
Laureus Sport for Good Award: TeamUp