Kum 2018 assembly inthlanah khan BJP chu party mala bial la hnem ber niin bial 104 an chang a, Congress-in bial 78 leh Janata Dal (Secular) ten bial 37 lain an dawt a. Congress leh JD(S) tang dunin sorkar siamin BJP chu eptu-ah an thu a; mahse, thla 15 chauh a liam hnuah rorel lai MLA eng emaw zatin BJP zawmin sorkar a tlu zui a, BJP kaihhruai sorkar a din phah.
Saffron party hi kumin kumtir lama sorkar contractor intihhlum chhanah puh an ni a, MLA pakhatin thamna a la lai man a ni bawk.
Congress chuan inthlan dawnah hian Karnataka Contractors’ Association-in BJP minister leh thuneituten sorkar hnuaia hna thawh reng rengah thamna emaw, commission emaw, hna hlut zawng atanga 40% an hauh thin tia an sawi chu campaign au hla berah an hmang a. BJP hruaituten an puhna hi pha mah se boruak a lian hle.