Aizawl : Nimin khan sensitization on Indian public health standards (IPHS) 2022 neih a ni a, Principal Secretary, H&FW Esther Lalruatkimi’n a hmanpui.
State Nodal officer (training) Dr. Zorinsangi’n mipuite hriselna atana sorkar damdawiin, District hospital atanga Sub centre thlenga IPHS inkaihhruainain a sawi thawktu awm zat tur leh an mawhphurhnate, hmanraw awm tur te leh a building sak dan tur bik a tih chungchangah te zirtirna a pe a ni.
Dr. Zorinsangi chuan IPHS inkaihhruaina chungchang sawiin, Mizoram ang tlangramah chuan mihring 3000 awmna zelah sub centre pakhat awm tura tih a nih thu a sawi a. Sub Centre-ah te chuan Health Worker mipa leh hmeichhia pakhat zel awm tura tih a nih thu sawiin, Health & Wellness Centre-a hlankai tawhah Health and Wellness Officer pakhat zel awm tura tih a nih thu a sawi.
Primary Health Centre chu mihring 20,000 awmna chinah din tur a nih thu leh damlo khum pahnih atanga paruk thleng awm tur a nih thu sawiin, Community Health Centre (CHC) chu mihring 80,000 tal awmna chinah din tur a nih thu leh damlo khum 30 awm tur a nih thu a sawi a. Duhthusam chuan Medicine Specialist, Surgeon, Gynae Specialist, Pediatrician leh Anaesthetist pakhat th- euh talin an thut chilh tur a nih thu a sawi.
Mihring 1000 zel awmnaah damdawi in khum pakhat zel awm tur a nih thu sawiin, khum pahnih tal a awm theih chu duhthusam a nih thu a sawi bawk.
District Hospital atan mihring nuai hnih chin awmnaah damdawi in khum 100 a awm tur a nih thu a sawi a. Mihring nuai hnih atanga nuai nga awmnaah damdawiin khum 200 a awm tur a ni, a ti.
Mizoramah chuan damdawiin khum zat chu awm tha thawkhat mahse, heng damdawiinah te hian thawktu – doctor, nurse leh dam- dawi lam thiam awm tur zat IPHS-in a duan ang dah tur zat leh infrastructure tul leh mamawh engemawzah a awm ngei ngei tur a nih thu a sawi.
Workshop-ah hian hun hmanpuitu Principal Secretary Esther Lalruatkimi chuan Health and Family Welfare department hnuaia thawktute chu IPHS ang thlapa mahni facility ah theuh hma la turin a chah a. IPHS norms anga kal tur chuan tehfung pawimawh tak tak chhawpchhuah a nih tur thu sawiin, tehfung te chu delhrittu maia ngai lova, chona-a ngai tur leh hneh thei ngei tura tanlak chu an tihmakmawk a nih thu a hrilh bawk a ni.