Aizawl : Rilru leh taksa lama harsatna hrang hrang nei naupangte enkawlna hmun Child Development Centre chu thawhlehni khan Aizawl North II MLA Dr Vanlalthlana’n Ramhlun South-a Haulianthanga building-ah a hawng.
Kum 2012 khan Child Development Centre hi Aizawl Dawrpui venga C Sawivela building-ah tanin kalpui a ni a. Tunah hian thawktu mi 20 vel awmin, tun thlenga naupang enkawl ngai inziak lut tawh hi 1300 vel an ni tawh a. He’ng hnathawktute hian naupang taksa leh rilru lama harsatna neite leh an chhungte chu kawng engkimah chhawmdawlin, an harsatna sutkian pui a, kawng tinreng a hmasawnna an neih theih nan leh naupang dinhmun zirchiangin enkawlna hna an thawk thin a ni.
Child Development Centre-ah hian mi thiam hrang hrang, he’ng naupang doctor, clinical psychologist, occupational therapist, speech therapist leh special educator te he hmunah hian awmkhawmin enkawlna kimchang tak an pe thin a a. He hmunah vek hian kumin academic year tan pre-school, day-care leh lower KG kai thei naupang te tan CDC, school section chu hawn tel a ni nghal bawk.
CDC building hawngtu Dr Vanlalthlana chuan taksa leh rilru lamah harsatna nei naupangte enkawlna tur din a ni chu lawmawm a tih thu a sawi a. Centre-a thawktute hian hmangaihna tak tak nen a naupang harsatna nei te enkawl a, lo kuangkuah zel turin a chah bawk.