India-a a hmangtu tam takin an number hriat ngai loh, ram dang number ni bawk si atanga call an dawn fo avanga phunna a awm hnuah WhatsApp chuan a hmangtute chu heng number hi lo block tur leh report zel turin an ti.
Indian tam tak chuan audio leh video call an dawn an screenshot-te chu nasa takin social media-ah an thehdarh hlawm.
India-ah hian WhatsApp hmangtu mi maktaduai 487 chuang awmin khawvela hmangtu an tam berna ram a ni.
Sorkar thupuangtu pawhin ‘service provider-ten spam call chungchangah hian hmangtute kaihhruaina a tichhuak’ tih a sawi.
Mi tam tak chuan an screenshot chu online-ah an thehdarh hlawm a, Asia chhimchhak leh Africa ram atangin call an dawng nasa em em niin an insawi hlawm.
Hetianga call dawng thin tam zawk chuan tun hnaiah nasa takin hriat ngai loh, ram dang number atanga call an dawn hi a pung nasa hle niin an sawi.
NDTV-in an thuchhuah a puanah messaging platform hian a hmangtute chu app-a awm privacy control hmang tur leh an account a him nan an mi mal thilte chu phone number an neihte chauhvin an en theiha dah turin an ti.
“Heng account-te hi WhatsApp-ah report-in thlen ula, keini pawhin a tul angin hma kan lo la ang a, platform atangin kan paih thei ang,” tiin company thupuangtu chuan Times of India chanchinbu hnenah a sawi bawk.
An platform-a hetianga mi tibuai thinte ven nan hian WhatsApp chuan March thlaah ringawt khan account maktaduai 4.7 zet an titawp tih a sawi.
Company hian a hmangtute online scam, fraud leh thil dang laka an him zawk nan an hmanraw dahte hman dan zirtirna pawh an tichhuak nasa tih a sawi bawk.