Myanmar chanchinbumi pathum leh mihring dikna chanvo humhalhtu pahnihte chu Thailand-ah dan lova luta puh an nih avangin an chungthu ngaihtuah a ni dawn a, thawn haw an ni mai thei.
A thiam lo zawkah an tang a nih chuan Myanmar rama thawn kir an ni dawn a. An nunna atan a hlauhawm niin heng mite hian an sawi.
February 1-a sipaiten mipui sorkarna an hnehchhuh hnuah chanchin thar buaipuitu tam takte chu Myanmar ramah man a, thiam loh chantir mek an ni.
Lungawi lohna lantirtu civil mi 700 chuangin sipai leh police lakah nunna an chân tawh a, sang tam tak man an nih thu BBC-in a tar lang.
Heng mi panga, Thai thuneituten an hming an la tar lan lohte hi Chiang Mai khawpuiah police-ten Pathianni khan an man.
Chanchinbumi pathumte hi news media lar tak, Democratic Voice of Burma (DVB)-a thawk an ni.
Dan lova Thailand ram luta an puhnaah thiam loh an chang a nih chuan an ramah thawn let nghal an ni ang.
News media dangte angin DVB-hi Myanmar ram chhungah hnathawh khapsak an ni.
DVB hian Thai thuneitute chu heng mite hi an rama thawn let lo turin na takin an nawr ve mek a, an thawn let a nih ngat chuan an nunna atana a hlauhawm thu an sawi a, Bangkok-a United National High Commissioner for Refugees leh ram dangte tanpui turin an ngen mek.