India chuan kum liam ta chhungin Russian tuialhthei a lak luh chu a hma kum aia a let 10 zeta tam a ni tih sorkar hnuaia awm, Bank of Baroda chuan a sawi.
Asia-a economy lian ber pathumna hian Moscow atanga tuialhthei thlitfim loh a lei tam avang hian $ tluklehdingawn nga lai a hum theih phah niin a sawi bawk.
Russia hian Ukraine a rûn avanga hrek nan khawthlang ramten a energy an leisak thin an tihtawp mek laiin India-in a leisak a tipung ve thung a ni.
Russia hian man tlawm zawkin ram thenkhat, China leh India leh a dangah te a hralh a. India hi khawvela tuialhthei lei tam ber pathumna a ni.
Kum 2021 kha chuan Russian tuialhthei a lak luh hi ram dang atanga thlitfim loh a lak luh zinga 2% emaw chauh a ni a. Kum liam taah erawh chuan 20% zet a tling niin Bank of Baroda chuan a sawi.
India-in tangka kum liam ta chhunga Russia atanga tuialhthei a lei avang hian tonne khatah $89 vel a hum zel ang niin tar lan a ni bawk.
US leh Europe ramten India hi nasa taka nawrin khawthlang ramten Russian thil la lut lo tura an ngenna chu a zawm duh lo va. Russia-in Ukraine a rûn chu demna thu sawi ve ngei turin New Delhi hi an phut nasa hle bawk.
India hian a innghahna chu a lak luh atang a ni a, mi rethei maktaduai tam tak tan Moscow atanga tuialhthei a lei hi a tha zawk niin a sawi a, man tova ram dang atanga la lut ve thei a nih loh thu a sawi a ni.
Ukraine-a indona a chhuah hnuah Europe ramte chuan India aiin Russia atanga energy an lei chu a let rukin a tam zawk niin External Affairs Minister S. Jaishankar chuan nikuma TV-a an kawmnaah a sawi.
“Europe hian a lak luh hi a titlem hret hret zel a, chutih lai chuan a mamawh tawk ang tibuai lo turin a kal,” a ti.
“Hetiang hi an kal dan a nih avangin Europe hian ni khat thil thu-ah an titawp thut thei lo a ni,” a ti bawk.
Tun dinhmunah Ukraine indo hian tawp lam a la pan mai hmel si loh va, hei vang hian Russia hian Asia-a energy la lut tam ber ram hnenah hian man tlawm zawka a zawrh zui zel a rinawm niin mi thiamte chuan an sawi.
Energy analysis firm Vanda Insights-a mi, Vandana Hari-i chuan, “Russian thlitfim loh tuialhthei hi man tlawm zawkin ram pahnih, India leh China-ah hian a zawrh zel ang,” a ti.
India-a tuialhthei thlifimtute pawhin an hlam an tipung thei dawn a, indo a tawp hunah erawh a ngai anga an kal leh mai tur thu a sawi bawk.