Prime minister hlui Khan-a man a nih hnuah hian man a nih duh lohna chu an party miten nasa takin an lantir a. Ningani khan Lahore-a corps commander chenna in an luhchilh a, chandelier tichiain arawn, strawberry leh golf club an tichhiain an la chhuak a. Heng thilte hi ‘mipuite suma lei’ niin an sawi a. Lirthei leh vantlang thil tam tak hal a ni bawk.
Nilaini khan Islamabad-a kawngpui lian berah lungawi lo leh police an innawr nasa hle bawk a, police 145 chuang hliam tuar an awm niin police chuan an sawi a. “Muanawm taka lantir kan tum a; mahse, police hian min lo bei,” tiin mipui zinga pakhat, a kuta lung leh tiang kenga hmai tuam chuan BBC a hrilh a. “Kan thih hma emaw, Imran-a chhuah a nih hma chu kan kal zel ang,” a ti bawk.
Ram danga Khan-a thlawptute pawhin man a nih atanga ni hnih chhungin an awmhmunah an lantir ve bawk.
Pakistan Prime Minister Shehbaz Sharif warned chuan tharum thawh chuan engmah a thlen lo va, an ngaizam dawn lo tih a sawi a. “Mahni thua dan lekkawh ringawttute chu an kutah thir zam ve a ni ang,” a ti.
PTI mite hian lirthei an hal a, Nilaini zingah khan Lahore-a Sharif-a inah petrol bomb an vawm bawk niin tual chhung chanchinbute chuan an tar lang.
Sipaite chuan Thawhlehni kha chu ‘hun thim’ a nih thu sawiin lungawi lohna lantirtute chu vauin ‘sipai leh vantlang thil’ an khawih leh a nih chuan an chhan let ngei tur thu an sawi.
Police-in lungawi lohna lantirtu an man zingah PTI hruaitu hlun pahnih pawh an tel a, pakkhat chu an secretary-general, Asad Umar-a a ni.