Pakistan prime minister hlui, Imran Khan-a chu Thawhlehnia man a nih hnuah ei ruknaa a inhnamhnawiha puhna chu thu tlinga pawm a ni a, man duh lohna lantirtute avangin an ram pum a buai mek thung.
Police chuan Khan-a man duh lohna lantirna avanga tharum thawhna thlengah mi pariat vel thi an awm tawh thu leh mi 1,400 an man tlin tawh thu an sawi.
Tharum thawhna hmet mit turin sipai koh luh an ni a, lungawi lote chu sorkar thil khawih tawh lo turin na takin an vau nghal.
Khan-a hi an ram eibar dinhmun a hniam lai takin, sipai nena an inkar tha lo kal zel nen man a ni.
Cricket star hlui, kum 2018 leh 2022 inkara prime minister lo ni tawh hi thiam loh chantir a nih chuan mipui aiawhin pisa a luah thei dawn lo va, a dam chhung pawh a ni thei a. Inthlan hi kumin kum tawpa neih tur a ni.
Pakistan-a sipaite hi nuclear ralthuam nei ramah hian huhang an nei na hle a, tuna Khan-a mannaah leh a thubuaiah pawh hian a phena awm lian tak an nih rin a ni.
Mi thiamte chuan kum 2018 inthlana a chak pawh kha sipaite puihna niin an ngai a. Thuneihna a chan atanga paih thlak a nih hnuah erawh sipaite sawiseltu langsar ber a ni zui ta zawk.
Nilaini khan Khan-a hi prime minister a nih laiin dan lova an ramin thilpek a dawn hralha puhnaah thu zawh fiah a ni a, he thubuai hi Election Commission-in an hekna a ni a. Amah hi chuan dik lova tih engmah a nei lo niin a insawi.
A hma ni chiah khan venhim hna thawktu tam takin kum 70 mi hi thubuai danga court-a a inlan tur lo manin police lirtheiin an hruai.
Khan-a kaihhruai, Pakistan Tehreek-e-Insaf (PTI) party chuan Islamabad-a an hotupa man hi ‘inruk bona’ tia sawiin court-ah khin an tum.
Judge-in Khan-a hi police custody-ah ni riat awm turin a ti a, hemi hnuah bail a dil thei ang.
Prime minister atanga paih thlak a nih hnuah Khan-a hi ei ruk thubuai 100 chuang siamsak a ni a. Thla eng emaw zat man tum a lo ni tawh a; mahse, amah thlawptuten man tumtute lo dang zelin an man thei lo.
A dan hremi zinga pakhat, Sher Afzal Marwat chuan a client chu a tha tih a sawi.
Khan-a hi nikum April khan parliament-ah rintawk a hlawh loh avangin prime minister atanga paih thlak a ni.
November khan Wazaribad-a inthlan huaihawt hma nawra a campaign lai beiin a ke-ah kah a ni.
Amah beihna tur hian intelligence official-ten ruahmanna an siam niin a sawi a, sipaite erawh chuan an pha hle.