Aizawl : Land Revenue & Settlement Minister Lalruatkima hovin nilaini khan ‘Screening Committee for Exemption of SIA on the Land Acquisition for Shifting of Electric Tower’ an thukhawm a. Electric tower No-45(A) sawn chungchanga social impact assessment (SIA) exemption chungchang an sawiho.
Seling-Champhai electric tower sawn tur chungchang ngaituahhovin Power & Electricity department chuan a hmanhmawhthlak tawh thu sawiin SIA exempt tura competent authority-ah phalna dil ni se, an ti a. Tower chu sawn thuai a nih loh chuan tower-in a chawm khuate an thim reng dawn nia sawiin, danin a phal angin mipui vantlang thatna tur chuan compulsory acquisition kalpui theih a nih thu an sawi a. A rang lama hmalak a tul avangin bawhzui thuai ni se, an ti.
SIA chu electric tower sawn avanga kawng hrang hranga mipui a nghawng theih dan leh mipuiin an hlawkpui theih dan tur zirchianna a ni a. Mipui vantlang hamthatna tur leh a tha lo zawnga nghawng awm lo turah chuan exempt theih a ni tih sorkar thuchhuah chuan a tar lang.