MNF adviser Robert Romawia Royte, District Council & Minority Affairs minister chuan Chakma Autonomous District Council-ah MNF party-in nghet takin sorkar a siam dawn a, chu mi turin mihring an neih thu a sawi.
The Zozam Times-in a kawmnaah DCMA changtu minister chuan, “CADC-ah hian sorkarna kan siam dawn a, nghet taka sorkar zui zel turin number kan nei a, mihring kan nei,” a ti.
MNF party hian bial 19-a inthlanna neihah bial 10-ah an chak a, MDC 10 an nei bak pawh mihring an neih belh zel dawn tih Robert-a chuan sawiin, “Khawi party atangin nge kan lak luh dawn tih te, min rawn zawm turte hi tunah chuan sawi a la rem rih lo,” tiin a sawi.
Robert-a chuan MNF party-in an lo tiam tawh ang ngeia sorkar ngelnghet din chu an theih a beisei tih a sawi a, “Term liam taa music chair ang maia inpaih thlak ang kha awm lo turin a tir tê atangin hma kan la nghal,” a ti a, CADC sorkarin chairman tha tak, sorkar khalh tur EM tha tak a nei dawn tih a sawi.
CADC inthlanpui neih hi kumin kum tawpa MLA inthlanpui neih tur atan a pawimawh hle tih sawiin, CADC-a sorkarna an siam takah chuan Tuichawng bialah MNF-in MLA a neih ngei an beisei a, MLA bial dang paruk vel pawh a nghawng ngei dawn tih a sawi a ni.
MNF Adviser Robert-a chuan inthlan result an hmuh chu an beisei ang chiah chu a ni lo tih a sawi a, chuti chung chuan MNF thlang tlingtu mipui chungah an party-in lawmthu an sawi thu a sawi bawk.