Railways Minister Piyush Goyal chuan thla 22 liam ta chhung rel chesual avanga mihring nunna chân an awm miah lo tih a sawi.
Minister hian rel chesual avanga passenger nunna chân hnuhnung ber chu March 22, 2021-a mi daih tawh kha a nih thu a sawi.
Minister Goyal chuan Trinamul MP Dinesh Trivedi-an rela himna chungchang a zawhna a chhannaah nimin khan a sawi.
Rajya Sabha-a member thenkhatten hripui a len lai leh tun hnaiah rel tlan a mumal lo tia an sawi chungchang chu minister chuan, “Member thenkhat hian rel hi March, 2020 hma zawng khan tha takin a tlan tih leh an chawlh zawk hnuah April atang chuan an tlan leh tawh tih an hre reng lo palh a ni. Tunah hian hripui a len hmaa an tlan zat atang 70% an tlan leh tawh a, he rorelna ina member thenkhat hriat rengna hi a tha lo deuh a ni,” a ti.
Ministry-in himna chungchangah, a bikin leiah tun lai thiamna changkang hmanga thuam thar tuma ruahmanna a awm leh awm loh zawhna chhangin minister chuan, “India-ah hian relkawng lei 34,665 awmin thenkhat chu kum 100 chuanga upa tawhte an ni a. Ministry chuan a fur thutkhawm hma leh a hnu lamah pawh hengte hi a thlithlai mek,” a ti.
Heng leite vil tur hian drone hman tumna a awm leh awm loh chungchang zawhna pawh minister chuan, “Tunah rih chuan leite vil tura drone hman tumna a awm lo. A tul angte kan endikin kan thlithlai mek a ni a, member-ten rawtna an thlen erawh a tha hle a ni,” a ti.
Goyal chuan zawhna a chhannaah hian a vawi khat nan Railway Board chuan director-general for safety a nei thar tih a sawi bawk.