Pakistan prime minister hlui, Imran Khan-a chu ei ruk thubuaia man a nih dan dan lo tia Supreme Court-in a sawi tuk chiahah chhuah tura tih a ni zui.
Judge-te chuan Khan-a hi bail-a chhuah a phalsak a, chawlhkar hnih chhung chu an puhna hrang hrang hmanga man theih a ni dawn lo.
A hma khan Khan-a hian chhuah a nih pawhin an man leh mai a hlauh thu BBC a lo hrilh tawh.
Kum 70 mi, Khan-a man hi sipaite nena an inkar tha lo kal zel nghawng chhuah pakhata ngaih a ni.
Mi thiamte chuan kum 2018 inthlana a chak kha sipaite puihna avanga chak niin an sawi a, anni chuan an pha thung.
Sipaite nen hian an inkar a chhe zui a. Amah thlawptu tam takin an kalsan zui a, an ram eibar dinhmun a chhe nasa bawk a, parliament-a thlawptu a neih tam zawk pawh hlohvin paih thlak a ni ta a ni.
Kum li tling lo deuh thuneihna a chan hnua paih a nih hnuah hian sipai sawiseltu langsar ber a ni zui a, mi thiamte chuan sipaite huhang hi a tlahniam nasa niin an sawi.
A kaihhruai, Pakistan Tehreek-e-Insaf (PTI) party chuan prime minister a nih laia ram dang hruaituten thil pek a hralh nia an puhna chu politics avanga amah an beihna mai mai niin an sawi.
Khan-a hi Thawhlehni khan an khawpui, Islamabad-a court-a a inlan tur chu paramilitary officer-ten an lo man a ni.
Zirtawpni khan Chief Justice Umar Ata Bandial chuan Khan-a man hi court hung chhung a nih avangin dan lo a tihsak.
Khan-a manna tura thil kalpui dan chu a bul atanga tan that leh vek ngai niin a sawi bawk.
Prime minster hi Zirtawpnia a chungthu ngaihtuahnaah hian nasa taka ven niin amah thlawptute chibai a buk zauh bawk.
Thawhlehnia man a nih hnuah khan a tantute hian nasa takin duh lohna an lantir zui.
Duh lohna lantirnaah hian mi 10 vel thi tawhin mi 2,000 vel man an ni tawh bawk a. Lungawi lote chetna zingah hian Lahore-a sipai commander in luhchilh pawh a tel a, an hal a ni.
Buaina hmet mit tur hian sipai koh luh an ngai hial a, an luh hnuah hian Islamabad leh hmun dang, Punjab leh Khyber Pakhtunkhwa-ah chuan tharum thawhna a awm zui ta lutuk lo.
Zirtawpnia bail chungchang ngaihtuah a nih hma hian Khan-a chuan chhuah a nih veleh man a nih leh nghal a hlauh thu a sawi a, thuneitute pawh thunun theih loh buaina awm lohna tura thil ti turin a ti a. Mipui thinrim chu thunun an harsa tih a sawi.
“Engtin nge a hnu lama thil thleng chu keiin ka thunun theih ang?” tiin a sawi a ni.
Mi thenkhat chuan PTI hian social media-a mipui fuihin khawlaiah chhuaka lungawi lohna lantir turin an ti niin an sawi ve bawk.
Khan-a erawh chuan amah leh an party chuan muanawm taka duh lohna lantir tur chauhvin an ti a, ‘dan hnuaia chet tur’ tih chu an thu a nih thu a sawi ve thung.
“Dan kan bawhchhe ngai lo. Tunah pawh lungawi lohna an lantir anih pawhin, ‘Muanawm taka tih tur’ tiin ka sawi,” tiin courtroom-ah pawh a sawi a ni.
Ningani khan Supreme Court chuan Khan-a man dan chu dik lo a tih thu a sawi tawh a, a laka puhna siam erawh a la ding reng thung.
Nilainia an puhna ngaihtuahnaah chuan Khan-a hian judge hnenah engmah tihsual a nei lo tih a sawi.
Khan-a hian Zirtawpni khan dan bawhchhiatna hrang hrang neiah puh a ni tih a sawi a, hengz ingah hian firfiaka chetna, ram phatsan leh tihbawrhban pawh a tel.
Khan-a paih thlak a nih hnuah prime minister ni zui ta mek, Shehbaz Sharif chuan Zirtawpni vek khan Supreme Court-in a chhuah chu tha lo a tih thu a sawi nghal.
Judge-te chu Khan-a lamtangah puhin an rorel dan chu ‘Pakistan-a court rorelna thihna’ tiin a sawi.
Khan-a leh a party chu tawngkam hriam tak tak hmanga mipuite khawlaia lungawi lohna lantir tura an fuihnaah a dem bawk.
“Imran Khan hian he ram hi a then darh a ni,” a ti.