Aizawl : Students’ Self-support union (SSU)-in nimin khan Chanmari YMA hall, Aizawl-ah intodeh campaign leh career awareness programme an buatsaih a. Dr. JT. Vanlalnghheta, Jt. Labour commissioner, LESDE department-in a telpui a, Vanneihtluanga, Chanmari, Aizawl resource person a ni.
Resource person Vaneihtluanga chuan zirlai kalkhawmte chu eng hna pawh thawk hreh lo tur te, intodelh tur chuan mahni inrintawkna nen theihtawp chhuaha eng kawng pawh hmachhawn ngam tur tein a chah a. Kawng a awm lo a nih pawhin mahnia kawng inhai kaw chawp thei tura tanlak a tul thu a sawi.
Tunlai thiamnain a ken tel, technology lama hmasawnna chu hlau lova, lamtanga siam thiam a tul thu pawh sawiin, Vanneihtluanga chuan “kan lamtanga kan siam chuan kan ta a ni mai” a ti bawk.
Jt. Labour commissioner, LESDE department Dr JT Vanlalngheta pawhin zirlaite fuihna thu sawiin, “kan nihna ang anga thil kan tih hian theihtawp chhuah ila Pathianin mal min sawm thin” a ti a. LESDE hnuaiah thil zir tur leh zir theih tam tak a awm thu sawiin, kuthnathawktu zawng zawngte tan labour law a awm thu te a sawi bawk a ni.