Serchhip district-a lirthei chuan man ennawntu committee chu nimin khan Serchhip Bawrhsap mawhphurhna la mektu Addl DC HD Lalpekmawia hovin an thukhawm a. State transport authority-in ruahmanna a siam angin passenger phur sumdawng lirthei chi hrang hrangte chuan man (passenger fare) ennawnin a rate thar tur ruahman chhinna (fare proposal) an duang.
Addl DC chuan lirthei khalha eizawng te chu mipuite mamawh hnathawktu rawngbawltu pawimawh tak an nih thu sawiin, chuan man lamah thahnem erawh an ngai lutuk anga, mipuite tan phurrit an ni ang tih a hlauhawm ve tho thu a sawi.
Lirtheia eizawngte leh a hmangtu mipuite tana chhe lo ve ve tura ruahmanna siam thiam a pawimawh thu Addl. DC chuan a sawi a. Taxi thenkhat uchuak deuh taka chuan man chhiar thin an awm nia a hriat thu pawh sawiin, mipui laka fello taka thil tih awm lo se a duh thu a sawi bawk.
DTO leh Member Secretary C. Lalawmpuia’n lirthei chuan man chu state transport authority-in kum hnih dana ennawn thin ni se a tih anga he meeting hi koh a nih thu a sawi a. District tinin ruahman chhinna siamin state transport authority lama thehluh leh tur a nih thu a sawi.
He thutkhawmah hian Serchhip Auto rickshaw owner association chuan an tlan chhuah kilometer hmasa bera Rs 30 an hman lai chu Rs 40 a tihsan an rawt a, a dawtleh kilometer rate awmsa (subsequent kilometers rate) Rs. 20 erawh an la chhe lova an inngaih thu an sawi thung.
Taxi owner association chuan tuna sorkar rate dinglai kum 2021 a siam aia tlawma an tlan mek thu an sawi thung a. Maxi Cab lam ten rate hmanlai metalled road a Kilometer khat zela Rs 3 leh unmettaled road a Rs 3.50 chu metalled ah Rs 4, unmetalled ah Rs 4.50 ni se tiin an ngen a. Bus lam ten an rate hman lai Kilometer khata Rs 2 chu Rs 4 ah tihsan an rawh thung a. Rawtna hrang hrang te chu State Transport Authority-ah an thehluh dawn a ni.
Taxi leh Auto Rickshaw permit pek belh an remtih leh tih loh sawi hona neihzui a ni a, tun dinhmunah Rickshaw leh Taxi te hi kan indaih rih nia an hriat thu tarlang a ni. District Transport Office chhinchhiah danin tunah hian Serchhip district ah Auto Rickshaw permit 535 leh Taxi permit 184 a awm mek a ni.