Aizawl: Zalen chanchinbu leh Lynchpin buatsaih Edufest vawi 21-na chu nimin khan Higher & Technical Education Minister Dr. R. Lalthanglina chuan Millenium Center Rooftop-ah a hawng.
Dr R Lalthangliana chuan zirna dap mek, zirlaite leh institution-ten hmaichhana inhmachhawnna an nei chu hlu a tih thu a sawi a, mi dang inrawlh ngai miah lova zirlaiten kawtkaia hetianga hun tha an nei chu an vanneih thu a hrilh.
Ram danga hnathawk tura chhuakten mi dang kaltlanga hna an zawn thin avangin harsatna an tawk fo thin tih a sawi a; “Chuvangin, hetianga hmaichhana inbiakna nei chunga admission tih theih a ni chu thil lawmawm tak a ni,” a ti.
Dr Thangtea chuan, “Tunlai khawvelah qualification ringawtin awmzia a nei tawh lo. Thiamna tak tak a ngai a, thiamna bik neite tan hna a harsa lo tih hi ka hmu chiang a ni,” a ti a. Zirlaite chu thiamna tak tak nei tura zir tura a duh thu a sawi a, “ZMC lamah pawh mi thiam bikte tan hmun a awm reng,” tiin, tunah pawh state pawn atangin loh theih lovin thawktu tur lak a ngaih thu te a sawi bawk a ni.
Hawnna inkhawm kaihruaitu, Zalen Editor Vanlalrema Vantawl chuan Edufest-ah hian college leh univertsity tha kohkhawm an ni a, zirlai leh nu leh paten duhthlan tur an neih theih phah tih a sawi a, zirlai sang tel tak meuhin kum 20 chhungin zirna tha zawk, a awm ngai tih an hriat loh an hmu tawh a, heta lo telte hi UGC/AICTE/NCI etc accreditation uluk taka enfiahsak an ni thin tih a sawi.
Kumin 21st Edu Fest-ah hian paramedical course, nursing, pharmacy, engineering civil, petroleum, computer science, agriculture, humanities, allied science, graphic designing lam te bakah Indian Army leh Indian Air Force te an inpho a, YesBank-in sutdent loan an thutpui bawk a ni.