1) C. DENGTHANGPUIL, ANM: ANM Course 1982-ah Health Worker Training School, Civil Hospital Aizawl atanga zirchhuakin, health worker hna kum 1982 atangin a thawk tan a. April, 2019-ah health supervisor-ah kaisangin a pension a. March, 2023 khan a thi.
Award a dawn chhan: New Vervek Health Sub-Centre-a a thawh lai, June 10, 1992-ah mipa naupang, Lalropuia (13), Malaria PF leh PV inkawpa damlo, nikhawhrelova awm tawh chau tak, hmunpui lam pan tura tihchet ngam tawh loh chu theihtawpa enkawlin a nunna a chhanhim.
2) VANLALTHUAMI, ANM: Kum 1988-ah Health Worker Training School, Civil Hospital, Aizawl atanga ANM course zirchhuakin, health worker hna kum 1988-a thawk tanin tunah hian Theiriat Sub-Centre, Lunglei-ah a thawk mek.
Award a dawn chhan: Sertlangpui Health Sub-Centre-a a thawh laiin October 23, 1993-ah Kawlziki w/o K. Rosangzuala fa 19-na tur fanu a chharsak a, naute hi a pian hnuah a hlam a tan avangin nasa takin thi a put a, hmunpui pan turin motor a awm loh bakah khawih chet ngam a ni lo va. Darkar ruk chhung zet theihtawp chhuaha a enkawl hnuah a hlam tang chu la chhuakin a nunna a chhanhim.
3) VANLALROVI, GNM: Kum 1992-ah School of Nursing, Civil Hospital, Aizawl tuna Mizoram College of Nursing ni ta atangin GNM course a zo va. Tunah hian Thingsulthliah PHC-ah staff nurse hna a thawk mek.
Award a dawn chhan: July 18, 2003-ah Lalhmunpuii (38), Serchhip khua, nau pai thi put nasa avanga Civil Hospital, Aizawl-a refer chu Thingsulthliah Dawrkawn an thlenin nikhawhrelovin a awm zui a, Vanlalrovi kal chhuak chuan hmuin Thingsulthliah PHC-ah a hruai a, theihtawp a enkawlin a nunna a chhanhim.
July 27, 2013 tlai dar-3 velah Stephen Ramnunpuia (18) chu bus tlan lai atanga tlain a hnar leh a bengahte thi nasa tak a chhuak a, a kaih zui bawk a. A theih anga bawihsawm nghalin a nunna a chhanhimsak bawk.
March 15, 2014-ah mipa kum 30 miin ama nunna lak tumin rannung thahna hlo a in a, nikhawhrelova a awm chu Thingsulthliah PHC-ah an hruai a,rang taka a pum thuahsakin a nunna a chhanhimsak bawk.