Aizawl: Chakma Autonomous District Council (CADC) inthlanna neih zawh taka MDC ngah ber, MNF party hruaitu, Rakesh Mohan Chakma chuan sorkarna a siam theih thu Larsap Dr. Hari Babu Kambhampati a hriattir tawh.
Chakma-a’n a sawi danin May 12, 2023 CADC-a MNF-in sorkarna an siam theih thu hi larsap a hriattir tawh a, MNF MDC 10 thlan tlinte bakah BJP MDC tling panga zinga pathum – Santosh Chakma, Montu Chakma leh Parimal Chakma te chuan MNF an zawm tak avangin MNF hian member 20 awmna CADC-ah hian MDC 13 neiin sorkarna an siam thei ta a. BJP MDC-ten an zawm hma kha chuan seat khat an la mamawh belh a. Bial 20 zinga 19-ah inthlan a ni a. BJP-in bial nga lain Congress-in bial li an la thung.
Tar lan tawh angin CADC-a CEM hlui, Amit Kumar Chakma, Rengkashya biala BJP candidate chu May 4 zan dar 11 vel khan Lokkisury khuaa MNF leh BJP tantute intihbuaina thelh tura a kal chu thah a ni a. A thattu-a rinhlelh, he biala MNF candidate Prema Ranjan Chakma chu police-in an man tawh a ni.
May 4 atanga 10 thleng khan Chawngte Sub Divisional Magistrate chuan Rengkashya bialah hian zan curfew a puang a. Ningani zan atang khan May 20 thleng zan curfew hi puan chhunzawm a ni. He bialah hian May 17-ah inthlan buatsaih a ni dawn a, May 19-ah vote tlate chhiar a ni ang.