Manipur buainaa kah hliam, Pauginmuan (25) chu nimin zing khan Aizawl Civil Hospital thlenpui a ni a, MLA pahnih, Dr. ZR Thiamsanga leh Dr. L. Thangmawia ten Mizoram sorkar aiawhin an lo dawngsawng.
Pauginmuana hi tun tuma buaina intan ni, May 3 zana Thengra Leirak-a inkahnaah telin kah hliam a ni a, a taksa hmun hrang hrangah silaimu 17 a lut nia sawi a ni.
Lamka Hospital-ah silaimu pali chu lak chhuahsak ni tawh mah se silaimu thenkhat awmna chu thisen zam pawimawh tihchhiat palh hlauhthawmawmna laia awmte a nih avangin Aizawl panpui nia thudawn a ni.
Manipur buaina avanga hliam na zual mi pali – Paukhanhual; Diamond Thang; Hatkhanhoih leh James Nangminlun te chu Mizoram sorkar ruahmannain Lamka atangin army helicopter-in Guwahati-ah phurh an ni tawh a. May 4-a Manipur chief minister hova meeting zo haw lam Imphal khaw chhunga na taka sawisak, Thanlon bialtu MLA Vungzagin Valte pawh New Delhi-a Appolo Hospital-ah enkawl mek a ni bawk.
Tun tuma Manipur buaina avang hian Zohnahthlak 50 chuang thi tawhin Kristian biak in 60 chuang hal a ni tawh a. Zohnahthlak in tam tak hal ni tawhin Zo khua tam tak hal a ni tawh bawk a ni.