West Bengal-a dan lova halpuah siamna hmun siamna puakah mi panga an thi a, mi dang pasarihin hliam an tuar bawk.
Thawhlehnia puakah hian factory hi a chim chhe vek a, ruangte pawh a hung chhung chhehvelah an let a. He thil thleng hi politics-a eptu, BJP-in rorel lai, Trinamool Congress beih nan an hmang nasa nghal hle.
Purba Medinipur district-a Egra-a chhiatna thleng chhuitu tura kal police-te chu tual chhung miten an lo bei a. Factory neitu, Odisha ramri bul maia cheng chu an thenawm state-ah hian a tlanchhe zui nghal daih niin police chuan an sawi.
Chief Minister Mamata Banerjee-i chuan dan lova halpuah leh halmawi siamna neitu tlan bo hi a hmain police-in manin thubuai an siamsak niin a sawi a. “Mahse, bail-a a chhuah hnuah a ti leh tho,” a ti.
Thubuai hi state police hnuaia Criminal Investigation Department (CID) chhui zui turin a dah tih a sawi bawk.
BJP chuan ‘firfiak chetna’ tia sawiin Trinamool chuan an hma lawka panchayat inthlan lo awm turah bomb an siam niin an sawi a. Chhiatna hi BJP thlawp panchayat a din meknaa thleng a ni bawk.
“TMC hruaitu ta factory, bomb siamna a puak a. Hei hi panchayat inthlan tur atan dan leh thupek kenkawhna chhiatzia a tilang a ni,” tiin state BJP chief Sukanta Majumbar chuan a sawi.
“TMC-in panchayat inthlan tura mipuite tihhlauh nan bomb an siam,” tiin, Union Home Minister Amit Shah chu inrawlha chhui turin a ngen nghal bawk.
Banerjee-i erawh chuan dan lova halpuah siamna a nih thu leh dan leh thupek kenkawhna lam thil a nih loh thu a sawi ve thung.
Chhiatna thlenna chu BJP rorelna huam panchayat a ni a, Trinamool tan dan lova factory din ngaihna a awm lo niin a sawi bawk.