Aizawl : Kumina Chapchar Kut Souvenir ‘Nghilhloh Bu’ chu nimin khan Chief Minister Zoramthanga’n CM office conference hall-ah a tlangzarh a. Chapchar Kut thlirletin an thukhawm zui nghal.
Chief Minister chuan ‘Nghilhloh Bu’ buatsaihtu editorial board member-te leh tha thawhtute zawng zawng lawmthu hrilhin, “Mizo hnamin kut kan neih zingah Chapchar Kut chu a langsar ber leh hnam ziarang kan phochhuahna tha tak, state pawn leh ram pawn ami te pawhin an ngaihven a ni” a ti a. “Kan unau Myanmar, Bangladesh leh ramdang a awmte pawhin min hlutpuiin, hmang tura an rawn kal thin hi a lawmawm a hle a ni” a ti.
Hun kal zelah culture pawh zawi zawiin a inthlakdanglam hret hret zel tih sawiin, Chief Minister chuan, “kut kan lawm dan pawh a tha zawngin, a hma sawn zawngin a danglam zel” a ti a. Kut nuam leh hlimawm tak hman chhoh zel a beisei thu a sawi bawk.
Kut Souvenir tlangzarhna inkhawm hi I&PR Director C. Lalnunkima’n kaihruaiin, I&PR Jt. Director PB Lianthangpuii’n lehkhabu buatsaih dan report a pe a. Art & Culture Director Carol VLMS Dawngkimi, Chapchar Kut Programme Committee Chairman ni bawkin lawmthu sawiin hun a khar a ni.
Chapchar Kut Souvenir-ah hian thuziak 13 (Mizo leh English) bakah report leh kut hmanna thlalak hrang hrang dah a ni.