- Ruata
Hyundai micro SUV thar tur chuan thawm a la neih chhunzawm zel a. Tlangzarh hun tur sawi chian theih a la ni lo a, hetihrual hian Hyundai chuan he lirthei thar tura a himna hmanraw an dah tur te an puangzar.
Hyundai Exter hi tun atanga thla hnih khatah chuan an tlangzarh tawh mai a rinawm a. July emaw August emaw hi beisei dan chuan a chhuah hun tur a nih hmel a, media hrang hrang pawhina an rin dan a ni a. He lirtheia himna hmanrua tur hi a tha dawn viau mai a. Sub compact SUV huang leh a hnuailamah chuan airbag 6 nei hmasa ber a ni dawn a ni. Hei bakah hian Exter hi a huang angah chuan tyre pressure monitoring system nei hmasa ber a ni dawn a, hei bakah hian a huangchhungah chuan electronic stability control (ESC), hill assist control (HAC), vehicle stability management (VSM), dash cam with dual camera leh burglar alarm nei hmasa ber tur a ni.
Hyundai hian Exter lo chhuak tur hi advanced safety features an tih, himna hmanraw changkang 40 vel lai nei turin an duang a. Heng zingah hian Isofix, rear parking camera, headlamp escort function leh thil hrang hrang a tel a ni. Hei erawh hi chu a man to hoah a awm kim ang a. Variant zawng zawng, a man tlawm ber atanga a man to ber te hian himna hmanraw 26 an nei vek dawn a, a man to dan leh a variant san dan azirin a awm tam belh zel dawn tihna a ni. Heng zingah hian keyless entry, 3-point seat belt & seatbelt reminder, rear parking sensors, anti lock braking system (ABS) with electronic brakeforce distribution (EBD leh emergency signal system (ESS) te a tel dawn a ni.
Exter micro SUV hi trim hrang hrang – EX, S, SX, SX (O) leh SX (O) Connect te a awm dawn a. A man to ber tur SX (O) Connect hian a hming ang hian connected car feature an tih, hmanraw changkang a nei dawn a. Hyundai Exter-ah hian khawl chi 2 – 1.2L petrol leh 1.2L petrol with CNG kit te awm ang a, Hyundai lirthei danga kan hmuh ngai loh rawng thar mawi tak – Ranger Khaki kan hmu dawn bawk a. Mono leh dual tone rawng mawi tak tak duhthlan tur a awm dawn bawk a ni.
Micro SUV hi tunlaia kan hmuh tam subcompact SUV, Hyundai Venue te awmna huang aia la te leh a ni dawn a. Hei hi tunhnaiah kan hmu chho mek zel a. Entirna tha tak chu Tata Punch hi a ni a, hei pawh hi market lamah chuan a che tha chho hle a. Elpui tur tha tak mai Hyundai in an han duang leh tur hi thil tha tak a ni a. Lirthei leitute tan pawh duhthlan tur tha tak a awm belh ang a, he lirthei huang hi a rawn ti hausa lehzual dawn bawk a. An huangchhung mai bakah hian premium hatchback leh sub-compact SUV te pawh an rawn el thei viau turah a ngaih theih a. Lirthei tha leh lian lutuk lo, changkang bawk si hi Mizoramah pawh a hralh a kal chho viau turah a ngaih theih awm e.
Hyundai Exter kentel tur himna hmanraw hrang hrang-
Airbag paruk (6)
Keyless entry
3-point seat belt & seatbelt reminder for all seats
Rear parking sensors
ABS with EBD
ESS
Tyre pressure monitoring system (1st in segment)
Electronic stability control
Hill assist control
Vehicle stability management
Dashcam with dual camera
Burglar alarm
Isofix
Rear parking camera
Headlamp escort function