Aizawl : Lunglei district-a ruihhlo do kawnga beihpui thlak dan tur ngaihtuahin nimin khan Lunglei Bawrhsap Ramdinliani kaihhruaiin a kaihhnawih mipawimawhte an thukhawm.
Sorkar thuchhuahin a tarlan danin Lunglei district-a ruihhlo do kawnga beihpui thlakna turin sorkar atangin Rs. nuai 7 an dawng a. He sum hi a tangkai thei ang bera hman dan tur Bawrhsap hova thukhawm hian an ngaihtuahho a ni.
Lunglei district-ah hian middle school zirlai rual naupangah ruihhlo ti tan an tam hle niin he thutkhawmah hian sawi a ni a. School, college leh kohhran kaltlanga ngawrh taka awareness campaign neih an rel a. Awareness campaign leh hmalak dan tur chipchiar duang turin Core committee an din nghal.
Social Welfare & Tribal Affairs department hnuaia Mizoram Social defence & rehabilitation board-in district 8-a Middle school 77, High school 33 leh Higher secondary school 12-a zirlai 10,746, kum 10-17 inkar ten ruihtheih thil an tih dan a zirchianna December 2022 a tlangzarh taka a lan danin, Naupang school kal lai leh kal tawh lo te pawhin ruihhlo an hmelhriat hle.
Naupang ruihhlo tih tan kum chu a kum telin a hniam chho zel a. Naupang school kal chhunzawmlo thenkhatte chu ruihhlo an khawih vang a ni tlangpui. Ruihhlo chak zawkah lut chhovin an tih tam bakah an ti zing tial tial a ni.
Zirchianna atanga a lan danin, naupang ruihhlo ti thin zingah rilru lam kaihhnawih harsatna nei an tam phah nia hriat a ni a. Khawvel pum huap pawhin ruihhlo hmansual leh rilru lam kaihhnawih harsatna hian inkungkaihna a nei nia hriat a ni bawk.