Aizawl : School Education Minister Lalchhandama Ralte chuan National Education Policy (NEP) 2020 tlangzarh a nih hlimah Mizoram sorkarin Covid-19 vangin harsatna tawk mah se, rawtna siamte chu thui tak kalpui tawhin zaa 25 vel tihhlawhtlin a nih tawh thu a sawi.
Nimina School Education Department buatsaih Consultative meeting on implementation of NEP 2020 chu MINECO-ah neih a ni. Hun kaihruaitu School Education Minister Lalchhandama Ralte chuan NEP 2020 chu Covid-19-in a tihbuai hlima tlangzarh ni mah se a theih ang anga bawhzui nghal a nih thu a sawi a. Zirna lama mithiamte awmna Group of expert-te, task force te leh study group te din niin NEP 2020 rawtna bawhzui dan turte duan a nih thu a sawi.
Lalchhandama Ralte chuan NEP 2020-in rawtna a siamah hian sorkarin thui tak a kalpui tawh a, zaa 25 bawr vel hi chu tihhlawhtlin a nih hial tawh thu sawiin, “Mizoramah hian kohhran, tlawmngai pawl leh khawtlang hruaitute nena thawhhona a tha a, policy mumal tak neia kal zel dawn chuan tanho that zel a ngai dawn a ni,” a ti.
NEP 2020-ah hian mahni hnamzia Nationalism inzirtir theihna tur kawng a hawng zau viauin a lang a, Pathianin Mizote hi hnamah a siam a, he policy tihhlawhtlinnaah hian Mizo hnam nihna hi a laimua dah a ngaih avangin sorkarin a ngaih pawimawh thu a sawi bawk.
SCERT Director Laldawngliani Chawngthu sawi danin, NEP 2020 umzuitu tur Group of Expert te, task force te leh study group te bakah kum 2021-ah NCF atan Committee hrang hrang din a ni a. Early Child Care and Education (ECCE) chu tan nghal niin, pre-school 433 din tawh a ni a, Diksha portal hmangin zirtirtu 2673 te training pek an ni a. Anganwadi zirtirtu 800 training pek an ni bawk a. Pre-school zir turte pawh siam niin, NEP rawtna Bilingual textbook te pawh siam a nih tawh bakah Braille text book te leh large print text book te pawh siam a ni.