Aizawl : MPCC President Lalsawta chuan hun a tlem tawh avangin sorkar tha siam lo tur hian sorkar tum chi a nih loh thu a sawi a. “Nakkina tu leh faten min chhuahchhal lohna turin sorkar tha kan mamawh,” a ti.
Nimina Thakthing Veng YMA Hall-a Aizawl South II Block Meeting a hmanpuinaah Lalsawta chuan, “Nakkinah kan tu leh faten thinrima min chhuahchhal lohna turin vawiinah hian ram tana thil tha tih leh ngaihtuahna dik put hi a chhanna a ni. Chhuanlam engmah kan nei thiang lo. Mi ram leh hnamin min tihsak dawn lo, keimahni hi mawhphurtu kan ni,” a ti.
Mizorama thihna nasa lutuk hian sorkar tha kan mamawhzia a tichiang tih sawiin Lalsawta hian, “Sorkar tha siam lo tur hian sorkar tum chi a ni lo, hun a tlem lutuk tawh. Dawihzep leh hlauh nei chunga kal mai mai hman kan ni lo, a dik lo chu a dik lo, a tha lo chu a tha lo, a tha chu a tha, a dik chu a dik tlang tur a ni,” tiin kal tumna an hria a, pet goal-na tur lam an hriat a, tawngpawng pet avanga a ni lo lama goal sawn an tum ve lo a, goal chu a ngaiah nghet takin a awm reng tur a nih thu a sawi.
Lalsawta hian sorkar tha siam turin theihna an nei a, mipui pawhin an tlin thu a sawi a. “Mi tha, mi rinawm, Mizoram mipuiin an pawm, politics bawh fuh tum lo leh tihfuh tum lo, Mizoram tana sorkar tha siam tur Congress-ah an lo kal dawn,” a ti a; anmahni ang mi huaisen leh mi dik hi Mizoram leh Congress party-in an mamawh a, an lo kal dawn a, an thawk ho ang a, Mizoram hi sorkar tha an pe dawn tih a sawi bawk.
Aizawl South II Block President H. Lalduhawma kaihruai inkhawmah hian Congress Treasurer Dr Lalmalsawma Nghaka pawhin thu a sawi ve bawk.