Nimin khan ATL Road, Sekhum leh Ramlaitui khaw inkar, Sekhum ram chinah tank lorry chesualin a khalhtu, Laltanpuia (25) s/o Lobin Marandi, Tawipui North I khua chu a hmunah a boral.
Sekhum YMA hruaitute hnen atanga thu dawn danin, tanklorry AS-06/AC-1359 hi Assam motor, ABCI Company hire lai niin Aizawl lam pana kal a ni a, a chetsual lai hian oil phurh a nei lo a, a chetsual chhan tak hi hriat a ni lo a, kopang suin a let a, a body hnung lam hian a khalhtu Laltanpuia hi a delh bet a. A chetsual laia chuang ve a pa chuan hliam na a tuar lo thung a ni.
Sekhum YMA hruaitute chuan chetsual thu hi zing dar 10 rik hma deuhin khualzin veivakte hnen atanga an hriat thu leh an hriat veleh Ramlaitui YMA-te nen inbepawpin an buaipui nghal a, Sekhum ram chin a nih avangin Sekhum YMA-te hian ruang hi lain kuang an siamsak tih an sawi.
Laltanpuia ruang hi nimin tlai khan an khua, Tawipui North I panpui nghal a ni.