Aizawl: Mission Vengthlang YMA ruahmannain nimin khan an veng mipuite chu an veng pa, Lalsangzuala, mi kut tuara a thihna an demzia lantir nan an pungkhawm a, a na thei ang bera tualthattu hrem an phut.
He hunah punkhawmah hian mipui an tel thahnem hle a, punkhawm an neih chhung hian veng chhunga dawrte chu khar vek a ni.
He hun hi Mission Vengthlang YMA President Lalhmingmawia’n a kaihruai a, local council hruaitute, MHIP, MUP hruaitute leh Lalsangzuala chhungten thu an sawi a, mipui kalkhawmte chuan an veng mi leh sa, rawng taka thah a ni chu na an tih thu leh tualthahna chu an dem thute an au chhuahpui.
Mission Vengthlang mipuite chuan police-ten rang taka tualthattu an man chhuak thei chu lawmawm an tih thu te, tualthattu hian thurualpui a neih chuan rang taka man chhuah ngei an duh thu te, veng mipuite pawhin police-te hnu chhuina kawngah a tulna apiangah tanpui zel an inhuam thu te, tualthattu chu a rang thei ang bera hrem a nih theih nana hma la tura sorkar an ngen thu te an au chhuahpui a ni.
Tar lan tawh thin angin Lalsangzuala (31), Mission Vengthlang, Aizawl chu May 16, 2023 zing dar 5 vel khan Chhiahtlang leh Bukpui inkar, kawng thlangah thia hmuh a ni a, mi kut tuara boral ngei nia ngaih a ni a. He thil thlenga mawhphurtu ni ngeia hriat, Laldinthara (42), Khawruhlian Vengchung nia inchhal chu nimin khan police-in an man a ni.
Khawruhlian VC leh tlawmngai pawl hrang hrangte pawhin thuchhuah intawm siamin, he tualthahna a mawhphurtu nia hriat, Khawruhlian khua nia inchhal, Laldinthara chu an dem thu leh an khaw leilung a rah pawh an remtih tawh loh thu an sawi a, Laldinthara chu an khua atanga pem tawh, electoral roll-ah pawh chuang tawh lo, Khawruhlian khaw mi nihna nei tawh lo a nih thu an thuchhuahah chuan an tar lang bawk a ni.