Aam Aadmi Party (AAP), Mizoram chuan kumin HSLC result chhuakah sorkar sikulte a tichhe ber an ni chu sorkar tan thil zahthlak a nih thu sawiin, education minister chu a tih tur ti lo leh a hna vil hneh loah an puh a, bâng ngam turin an phut.
AAP, Mizoram hruaitute chuan nimin khan Aizawl Press Club-ah chanchinbumite an kawm a, tun hnai kum nga chhungin sorkar sikulte chu an pass percentage a tlahniam char char a, hei bakah hian sorkar sikul awm zat pawh a tlahniam zel a, hei hi sorkar tan a zahthlak ngawih ngawih a, education minister-in a tih tur a ti lo hle nia an hriat thu an sawi a, “Hetiang taka zirlaite leh zirna in ngaihsak lotu education minister hian a hna a ngaihsak lo a nih chuan a hna atangin bâng ngam rawh se,” an ti.
State danga education minister-te chuan sikulte tlawha an endik laiin Mizoramah erawh programme neihnaa sawm an nih loh chuan education minister leh minister dangten sorkar sikulte tlawh an tum lo tih AAP hruaitute chuan sawiin, Mizoram MLA zingah zirna ngai pawimawh tak tak tumah an hmu lo tih an sawi bawk a. Hetihlai hian AAP erawhin zirna an ngai pawimawh hle a, sorkarna an chang a nih chuan zirna leh zirna in siam thar nghal an tum dawn tih an sawi bawk a ni.
AAP, Mizoram hruaitute chuan AAP Delhi-in AAP Mizoram state president atan Andrew Lalremkima an rawn ruat thar tih an puang bawk a, AAP Delhi angin Mizoramah pawh an kal ve dawn a; mahse, siam rem ngaite erawh siam rem a ni dawn tih an sawi bawk a ni.