MPCC President Lalsawta chuan inthlana pawisa chakna hneh an tum thu leh mipui sum hmanga candidate te sum senso rulh thin tihtawp an tum thu a sawi.
Zirtawpni khan Congress Bhavan-ah Friday Political session neih a ni a, he hunah MPCC President chuan an party-ah ukil pali a lawm lut nghal.
Lawm luh inkhawmah Lalsawta chuan Congress party chhiat lai bera dawmkang tura tha thawh inhuama an party zawm thar ukil an nei chu lawmawm a tih thu a sawi a. “India ram politics dinhmun hrethiamtu leh, sakhaw zalenna duh tute an lo luh zel ka beisei tlat a ni,” a ti.
Lalsawta chuan CADC inthlan neih zawh takah pawisa chakna an buan hneh loh avangin sorkarna an siam zo lo niin a sawi a. Candidate pakhat thihna avanga inthlan buatsaih that lehna bialah hnehna an chang chu ropui a tih thu leh Pathian hnathawh ni ngeia a hriat thu a sawi.
MPCC President chuan Mizoram mipuite nena tang tlangin Mizoram hmun dangah hi chuan pawisa chakna hi an hneh theih tawh ngei a beisei tih sawiin, “Mizoram mipuite hi KS ang mai maia lei theih an ni tlat lo! Inthlana pawisa chakna hi Mizoram mipuite, Kohhran mipuite nen tang tlangin kan do dawn a. Inthlanna a candidate-te’n an senso, mipui sum hmanga rulh leh an tum thin hi tih tawp kan tum dawn,” tia sawiin sorkar tha din tumin, mi rethei zawkte tan |ang Puihna an buatsaih thu a sawi.
MPCC Gen. Secy Dr. Ngurdingliana, ex-MLA, kaihruai inkhawmah hian Congress President bakah MPCC Treasurer Dr. Lalmalsawma Nghaka, ZORO Vice President Rohmingthanga Kawlni leh midang dangin thu a sawi bawk.