PC party chuan Myanmar, Bangladesh leh Manipur atanga Mizoram raltlante dawnsawn leh enkawl dan chungchangah sorkarin policy felfai tak a neih thuai a tul tih an sawi a, raltlan dawngsawngtu police duty an tlem thu an sawi.
Nimin khan PC party hruaituten Aizawl Press Club-ah chanchinbumite an kawm a, an president Vanlalruata chuan Myanmar, Bangladesh leh Manipur atanga Mizorama raltlante dawnsawn danah tuna sorkarin a kalpui dan aia him leh thlamuanthlak zawka kalpui a ngai tih a sawi a, “Kan enkawl leh awmtir dan hi kan ram economy tana tha tur te, kan hnam tana tha tur te, tun aia anmahni tana tha tur tea kalpui a ngai a ni,” a ti.
Ruata chuan raltlante dawnsawn leh enkawl dan hian ram leh hnam hmalam hun a hril thui dawn avangin mi tinin ngaihtuahna an hman a ngai tih a sawi a, Zau taka inrawnkhawmna atanga siam policy felfai sorkarin a neih thuai a, awmze neia kal thuai a tul nia an ngaih thu a sawi.
PC president chuan tun hnaiah Manipur leh Mizoram inrina khuate an tlawh a, ramria police-ten raltlante an dawnsawn dan an zirchiang tih a sawi a, “Tuivai lei (bridge) bulah Manipur raltlan dawngsawng tur police 12 chauh dah an ni a, chung mite chuan lirtheia mihring chuang zatte bak an chhinchhiah lo,” a ti.
Raltlante chu an nihna chiang taka lo chhinchhiah a tul hle tih leh raltlan lo dawnsawn kawngah ruahmanna tha zawk a awm a tul hle nia an hriat thu a sawi bawk a ni.