Mizoram People’s Forum (MPF) hruaitute chuan nimin khan Aizawl Press Club-ah chanchinbumite an kawm a, MPF-ah party tan lam neite chu tel lo ngam se an tih thu an sawi.
MPF hruaitute chuan, “Pastor an ni emaw, upa an ni emaw, tu pawh nise, tan lam neite chu tel lo ngam rawh se kan ti,” tiin hemi chungchanga The Zozam Times zawhna an chhang a, MPF local forum-ah pawh tan lam nei chu ‘in telh loh tur’ tia thu an inchah thute sawiin, MPF-a tel turte chu an duhtui leh zual dawn hle tih an sawi a ni.
Kumin inthlanpui awm turah hian sum leh therhlo chi hrang hrang chelekna a nasa viau ang tih hlauhthawnna a nasat thu te, suma inleina hian nghawng tha lo a neih nasat thu leh hengte avang hian party tinte chu sum leh therhlo hmanga vote lei lo turin an ngen tih an sawi.
MPF chuan party tinte chu an thawhhona thuthlung chu rinawm taka zawm theuh tura an ngen thu te, party policy leh manifesto-te hmanga campaign tur te, invau leh intihthaih lo tura an ngen thu te an sawi a. Mipuite pawh sum leh therhlo hmanga lei theiha awm lo turin an ngen a, mi rinawm, dik leh tha nia an hriatte huaisen taka thlang turin mipui an ngen tih an sawi bawk.
MPF hruaitute chuan kum 2023-a Mizoram Legislative Assembly inthlan tura MPF leh political party-te thawhhona thuthlung an siam chu thuthar thehdarhtute hmaah hian an pharh bawk a, kumin inthlanpui neih hunah house to house campaign chu neih phal a ni tawh dawn lo.
Hetianga ruahmanna thar a awm chhan chu party tinte hian house to house campaign hi an zo lo nia an sawi avangin house to house campaign chu neih lo nise an ti ta tih MPF hruaitute chuan an sawi bawk a ni.