Mizoram Board of School Education (MBSE)-in nimin khan Higher Secondary School Leaving Certificate (HSSLC) Examination, 2023 result a tichhuak a, zirlai exam beitu 14,091 zinga 1,1084, za zela 78.66 an pass a, nikum aiin kumin pass percentage 3.41-in a hniam.
Pawl 12 result hi nimin chhun dar 12-ah tihchhuah a ni a, Chaltlanga MBSE Office tualah tar chhuah a nih bakah MBSE website-ah dah a ni bawk.
Distinction-a pass mi 809 an awm a, first division-ah 3,451, second division-ah 4,268 leh third division-ah 2,556 an pass a; fail 3,001 leh compartmental chance nei 76 an awm bawk a ni.
Arts subject-ah exam 10,216 zinga 8,003 pass-in, pass percentage chu 78.34 a ni a, compartmental chance nei zirlai pakhat a awm a, hlawhtling zo lo zirlai 2,212 an awm bawk a. Arts subject bikah chuan Home Missions School, Aizawl zirlai, Rodinpuia Ralte s/o Lalremruata chuan mark 500-ah mark 469 hmuin a pakhatna a ni.
Science subject-ah exam 3,075 zinga 2,389 an pass a, pass percentage chu 77.69 a ni a, compartmental chance nei zirlai panga awmin hlawhtling zo lo 681 an awm a. Science-ah hian pakhatna chu St. Joseph HSS, Aizawl zirlai, Jonathan Lalhruaitluanga s/o C Lalduhawma a ni a, mark 458 a hmu.
Commerce Subject-ah chuan a pum puia Mark 473 hmutu, Aizawla St. Paul’s HSS zirlai, Vanlaldika s/o Laldakawma Hauhnar chu pakhatna a ni a. Commerce subject-ah hian zirlai exam 800 zingah 692 an pass a, pass percentage chu 86.50 a ni a, hlawhtling zo lo 108 an awm bawk.
Result puan a nih hnu hian MBSE Chairman JH Zoremthanga chuan chanchinbumite a kawm a, kuminah nikum aiia pass percentage a chhiat zawk thu sawiin, “Nikum a that zawk chhana lang chu Covid vangin syllabus tihthlem a ni a, zawhna awlsam tihchhuah a ni,” a ti.
Kuminah erawh course tihthlem a ni lo va, zawhna harsa chi telh a ni tawh tih a sawi a, a pum puiah result tha lo zawk angin lang mah se Science leh Commerce-ah erawh nikum aiin result a tha a, Art-ah result a that loh vanga a pum puia lang chhe ta a nih thu a sawi.
JH Zoremthanga chuan candidate zawng zawngte pass vek thei chu Arts-ah sikul 54, Science-ah pahnih leh commerce-ah panga an awm tih an sawi a, candidate fail vekna chu Arts leh Science-ah school pakhat ve ve an awm a, Commerce-ah a awm lo tih a sawi.