B Coldplay puipa Chris Martin chuan Malaysia-a concert thulh tura hriattirna chu chhang letin, mitin tana inlan tur an nih vangin ruahmanna awm tawhsa anga kalpui a ni ang,a ti.
Malaysian Islamic Party (PAS) hruaitu Nasrudin Hassan chuan National Stadium Bulkit Jalil, Kuala Lumpur-a November 22-a Coldplay show chu an ram, hnam leh sakhuana nen a inmil lo, niin a sawi.
“Sorkar hian he ramah hian eng thil nge suanluh a tum a, tuhluh phet a tum tlat hi le? Malaysia-a concert in neih tur thulh turin thurawn ka pe che u a ni. Kan sakhua, hnam leh ram tan engmah thathnemna a awm lo,” tiin a umzui.
Hassan-a ngenna leh hriattirna hi he rama a vawikhat nana show neih tum Coldplay hian an ngapawmawh lem lo niin a lang a, sorkara minister thahnem takin Hassan-a thu leh hla hi an pawm lo bawk.
Chris Martin chuan, “Malaysian mite ka hmuh apiangin an hnen atangin hmangaihna leh duhsakna a luangchhuak thin tih ka hmuchiang tawh. Kan show-ah hian mi tu pawh an leng vek a, mi zawng zawng kan hmangaih vek avangin lo kal vek turin kan sawm che a u a ni,” tiin a chhanglet.
A sawi zelnaah, “Hruaitu zawng zawngte leh hnungzuitu zawng zawng tiamin, tumah kan thliar hrang lo. Kan show-ah hian lo kal ngei turin kan duh che u a, zalen takin in awm thei a, mahni nihna ang anga ngaihngam taka awm theihna boruakah hian in lo tel vek kan duh a ni. Kan lo kal dawn vanga lawm lo an awm a nih chuan, a pawi ka ti.. mahse, kan hmangaih vek che u a ni,” a ti bawk.