Aizawl : ZPM Working President K Sapdanga’n MNF leh Congress party-in ZPM Leader Lalduhoma nen inngeihlohtir an tum thar leh nasa nia sawiin, “Leader atana Pu Duha pawm lo leh Chief Minister atana Pu Duha pawm lo tan ZPM-a awm hi a remchang lo,” a ti.
Kar kaltaa Aizawl North-II block ZPM extended meeting, Tourist Lodge, Chaltlang, Aizawla neihah he thu hi K Sapdanga chuan a sawi a. “Kan lungrualna tichhe tur zawnga min beihna hi ZPM chuan kan nghin phah tur a ni lo” tiin, “ZPM hi ka chhuahsan a nih ngawt loh chuan Pu Duha Leadership hi lungsi takin ka pawm a, Val Upa Council rorelnaah hian ka lungawi a ni,” a ti bawk.
ZPM Working President chuan, Mizoramah ZPM thli a tleh mek nia sawiin, thingtlang, khawpui leh sorkar hnathawk zingah pawh a tleh mek niin a sawi a. Sorkar tha, kalphung thar, mipui sorkar duhna a lian hle nia a lan thu a sawi bawk.