Aizawl : Thirsakawr (Bicycle) hmanga India rama state hrang hrang fanchhuah tum mektu Aasha Malviya chu Inrinni tuk khan Sports Minister Robert Romawia Royte-in tukthuan a buatsaihsak a. Hemi ni vek hian Chief Minister Zoramthanga hmuin, DGP Devesh Chandra Srivastva pawh a hmu a, Zirtawpni khan Larsap Dr. Hari Babu Kambhampati a hmu bawk.
Aasha Malviya hi Madhya Pradesh-a Rajghar district-a Nataram khaw mi niin, India rama hmeichhiate himna tur leh an dinhmun chawisan leh remna leh muanna tlangaupuia Thirsakawr hmanga India ram fan chhuah tum a ni.
November ni 1, 2022-a Bhopal, Madhya Pradesh atanga Pan India Cycle Tour a kalpui hian kawng engemaw zawng tala hmasawnna tha a thlen a beisei thu Aasha Malviya chuan a sawi a. Chief Minister Zoramthanga pawhin a huaisenna fakin, a kal zelna turah duhsakna a lo hlan.
Aasha Malviya hian Zirtawpni tlai dar 3:30 khan Aizawl a lo thleng a, Mizoram tiamin state 19 a tlawh tawh a, km 16200 a thui a tlan tawh. A ruahman dan chuan km 25000 tlanin state 28 tlawhchhuah a tum a, kumin August ni 15-ah Delhi-ah Pan India Cycle Tour chu tihtawp a tum a ni.