Aizawl : Mizo Hnam Run chhung inkhawm zirtawpnia neihah MNF President Zoramthanga, chief minister chuan Mizo hnahthlak zawng zawng rorelna pakhat hnuaia awm tir chu MNF thil tum a nih thu a sawi.
MNF President chuan MNF danpuiah chuan an thuthlungah Mizo hnahthlak zawng zawng rorelna khat hnuaia awmtir chu a thil tum zingah a lang tih a sawi a. Hei hian a tirah chuan Manipur, Tripura leh Assam-a chengte chauh huamin, India-a awmte chu chhanchhuah theih an ni a, heihi a thil tum hmasa a ni tih a sawi.
Zoramthanga chuan kum 1965-ah Manipur Zo hnathlak unaute nen inkhaikhawmna tur buaipui an ni a, kum 1966 ram buai hnuah pawh Manipur-ah operation neiin tam tak chu underground-ah an lo chhuak a, tam tak an martar a, thisena baptis an nih thu a sawi.
Kum 1986-a India nen remna zawnga an inbiaknaah Zo hnahthlakte chu rorelna pakhat (administrative unit) hnuaia awm turin an nawr tih sawiin MNF President hian, “India sorkar chuan (Danpui) Article 3-ah a awmsa avangin comment pek ngai an ti lo,” tih sawiin hemi chungchang hi Peace Accord-ah chiang taka ziah lan a ni a, Manipur unaute nena hmalakna chu a inchiah ta vang vang niin a sawi.
Tuna Manipur buainaah Mizoram duh dana barh luih a rem lo tih sawiin, “Article 3-na angin duh an thlang thei. Keini chuan kan bei tawh a, martar thisena baptis thlap tawh an ni. Tunah chuan an kutah a awm tawh a, an inchhandam nan an duhthlanna a pawimawh. Keini chu Pu Denga hunlai atangin kan dinna a la ngai reng,” a ti.
Zoramthanga chuan Manipur buainaah buhfai, damdawi leh an mamawhte pek a nih rualin tangkhangte hruaichhuak turin home ministry dawr a ni a. Tuivai lei pawh lirthei lian kal thei tura siam a nih thu a sawi a. “A piah lam pawh kan la inhuam vek a ni. Kan tan lak ve dan tur chu anmahniin an rawn chhawp ve a ngai,” a ti a. Raltlan chungchangah Covid-19 vanga buaina tinreng leh sum harsatna karah Burma, Bangladesh, Manipur atangin raltlan an lo lut a. Hengho hian Mizoram lo chu tlanna dang an nei lo, Mizoram hi an Jerusalem leh an thlamuanna kulhpui a nih thu a sawi.
MNF President chuan nationalism chungchangah party dangin ‘Independence an sual lo’ tiin sawi mah se, thangthar leh zirlaite’n an rawn chhang thin a, Nationalism an rawn championpui ta zel tih sawiin, “Thenkhatin nationalist rawn inti mah se sabengtung, sakei vun sin ang chauh an ni. Keini chu martar thisena lei leh a neitu – ram leh hnam tana kut ser kan ni. Tui anga nghet lote tan kan unaute thisen man a pek theih loh,” a ti.
Chhung inkhawm hi MNF Vice President Vanlalzawma’n a kaihruai a, Manipur buainaa Zo hnahthlak thi (martar)-te sunna hun hmangin ngawi rengin minute khat an ding a ni.