Aizawl : ZPM Leader Lalduhoma chuan rorel lai party-in ZPM sorkar mai tura an rin ngheh tlat avangin nasa takin an bei mek niin a sawi a.
Dampa West bial chhung khaw hrang hrang tlawha zin Lalduhoma hian Inrinni khan Pukzing Vengthar, Hruiduk, Phuldungsei, Parvatui leh West Phaileng khua te tlawhin vantlang inkhawmah thu a sawi.
Mi thar duhawm tak takin ZPM an zawm zel a, ch’ung zinga a tam ber chu rorel lai party atangin an nih avangin tuna sorkar lai mek hian an party chhungah harsatna namen lo an tawk tih a lang chiang hle nia sawiin Lalduhoma hian, “ZPM a sorkar dawn tih hi rorel lai party te hian an ring nghet tlat niin a lang a, nasa takin ZPM hi min bei mek a ni,” a ti.
Lalduhoma chuan Mizo thalaite zingah lehkha thiam tak tak an tam tawh a, chu’ng mite chu kaihhruai an ngai hle tih a sawi a. Ram danga thalaite khawsak dan leh hnathawh dan te an hmuin an hre zung zung thei tawh a; rual an awt em em a. Mi rama an tih theih hi Mizoramah pawh tih theih a ni tih an hria a, chumi ti thei tura pui tura an beisei ZPM an zawm ta zel tih a sawi.
ZPM chu mi mal hamthatna atana ding a nih loh thu sawiin Lalduhoma hian, “Ram a dinchhuah theih nan a ding a ni. Mipuite phurrit chhawktu tur sorkar kan mamawh a, chunglam thil tihtheihna ring chungin kan ram hi kan dinchhuahpui theih ngei kan beisei a ni,” a ti.
ZPM-in Dampa bial vil tura a ruat Vanlalsailova pawhin thu sawiin, Dampa bial hnufual bikzia a hriat fo thin chu a taka hmutu leh a chhunga chengte harsatna mit ngeia a hmu chuan a khawih dan a dang hle tih a sawi a. Dampa bial mipuite chu rilru thar pu a, Mizorama bial hmasawn ber an nih theihna tur leh mipui sorkar a din ngei theihnan thawhpuiah a sawm bawk.