Manipur state chhunga Zohnahthlakte chen tamna, Churachandpur district chhung, Pangjol khuaa children’s home-a naupang awmte chu an rama buaina chhuak avangin hlauhlawpin Mizoramah an tlan lut a, naupangte hi Berawtlanga art & culture building-ah dah an ni a, sorkarin an ei leh in tur ngaihsak mah se chhawmdawl leh puih an ngai hle.
Roslyn Kimbuang-i din leh enkawl, Discipleship Making Ministry (DMM) Children’s Home-ah hian hnam hrang hrang naupang 30 an awm a. May 3-a Meitei leh Zohnathlakte kara buaina a chhuah hnu atang khan naupangte awmna hmun hi a him lo hle a, in hal thawm te, silai puak ri leh in sawisa ri te an hre fo a; an awmna hmun pawh beih tawk mai thei dinhmunah a ding.
DMM Children’s Home founder, Roslyn Kimbuang-i’n The Zozam Times a hrilh danin, naupangte chu an thla a muang lo a, an rilru lamah nghawng tha lo a awm tih leh buaina chhuak nghawng kal zelah ei leh inte an tlachham tan a, chumi avang chuan home-in sum a neih zawng zawng hmangin lirthei hmang chawpin Mizoramah an tlan lut ta a ni.
Mizoram an luh tirhin Aizawl-a Ainawn Vengah an innghat lailawk phawt a, an chungchang chu sorkar hotute hriattir an ni a. Tunah chuan Aizawl bawrhsap pisa enkawlin Berawtlanga, art & culture building-ah an awm mek a. An ei leh in tur hi sorkarin an ngaihsak a, naupangte chu an hriselna dinhmunte pawh endik an ni tawh.
Roslyn Kimbuang-i chuan tuna an awmna hmunah chuan an him a, naupangte pawh an hlim hle tih a sawi a, “Ei leh in thuah chuan harsatna pawh kan tawk rih lo,” a ti.
Hetihlai hian a enkawl naupang hriatpui lohin rilru hah rukna lian tak an nei tih sawiin, “Tunah kan awmna hmunah hian kan awm reng thei dawn lo a, chumi hunah chuan eng angin nge kan let leh ang tihte hian min tibuai hle,” tiin a sawi.
An home chu mi inphalte thil pek khawm hmanga innghat a nih thu sawiin, tunah an state pum a buai tawh avangin an tan chuan tanpuina dawn tur pawh a harsat an rin thu a sawi a; an home chu sorkara inziak lut tura an hmalaknate pawh an state buainain a tikhawlkham ta vek tih a sawi bawk.
The Zozam Times-in DDM Children’s Home naupangte awmna hi Inrinni khan a tlawh a, naupangte chuan an awmna hmun chu nuam an ti a, Mizorama an zin chhan pawh hre thiam pha lote an awm a, naupang thinlung thianghlimte chu an dinhmun harsat zel dan tur hre loin Mizoram ralmuanna chuan an thla a timuang rih hle.
He children’s home-a awmte hi a then chu nu leh pa nei lote, nu emaw, pa emaw chauh neite leh thenkhat chu naupang enkawl ngai hrim hrimte an ni.
Heng fahrah raltlante hi Mizo Zirlai Pawl leh MHIP General headquarters hruaituten Inrinni khan an tlawh a, tanpuina sum fai an pe a. MZP chuan naupangte chu buaipui chhunzawm zel an tum a, tuna an awmna hmuna an awm chhunga an theih ang anga lehkha an zir theih nante hmalak a tum.
Chief Minister Zoramthanga pawhin Inrinni vek khan raltlante hi a tlawh a, an mamawhte sorkar hnenah thlen hreh lo tura chahin tanpuina tangkafai a pe bawk.