Aizawl: Aizawl East I bialtu, Chief Minister Zoramthanga chuan MBSE hnuaia kumin HSLC exam buatsaiha topper, Cynthia Lalhlupuii Shangpliang, a bial chhung ami ni bawk chu Falkland-a chenna inah kalin lawmpuina thuziak leh laptop a pe.
Chief minister chuan state puma titha ber nih chu thil awlai loh tak a nih laia a bial chhunga mi ngeiin chu dinhmun a chelh chu lawmawm tiin, a nu leh pate leh khawtlang tan hmingthatna a nih thu a sawi a. A kal zelna turah duhsakna hlanin, taimakna leh tumruhna nen bei chhunzawm zel turin a chah.
Chief minister chuan hlawhtlinna chang an awm rualin hlawhchham chang te, mahni inbeisei ang hmuh loh chang te a awm thin thu sawiin, chung hunah chuan hnual emaw, beidawn emaw mai loh tur a nih thu a sawi bawk.
Beraw tlanga art & culture hmunah tun hnai Manipur buaina avanga raltlante tlawh nghal bawkin chief minister hian an mamawhte sorkar hnenah thlen hreh lo tura hrilhin, tanpuina tangkafai a pe bawk.
Art & culture building-a awm mek te hi an vaiin mi 33, naupang 30 leh enkawltu pathumte an ni a. Manipur-a nu leh pa nei enkawltu nei tawh lo chawmna hmun atanga lo kal an ni.
Chief minister chuan a bial chhunga khawtlang hmalakna pakhat, Falkland a futsal ground sakna tur hmunhmaa hna thawh chu a enfiah bawk.