El Salvador khawpui, San Salvador-a football khelmualah mihring inchilna thlengah mi 12 vel an thi niin thuneituten an sawi.
Chhiatna hi tual chhung team, Alianza leh Santa Ana-a awm, Fas te Cuscatlán Stadium-a an inkhelh laia thleng a ni.
Inchilna a thlen hnuah hian inkhel pawh tihtawp nghal a ni.
President Nayib Bukele chuan hetiang chhiatna hi ‘an rin phak loh’ a nih thu a sawi a, ‘ngun taka chhui turin’ thil kalpui nghal a nih thu a sawi bawk.
A tirah police chuan mipa pasarih leh hmeichhe pahnih an thi niin an sawi phawt a, an vaiin kum 18 chung lam an ni.
Gate awmte khar a nih hnuah inkhel en tum mi tam tak luh luih tuma an innawrna atangin chhiatna hi a thleng ta nia sawi a ni.
Thuneitute chuan mi thenkhatin ticket lem an hralh a, an chhui mek tih an sawi.
Tual chhung chanchinbuten video an tihchhuahah chuan mi tam takin khelmual luhna luhna chu pawh darh tumin an bei nasa tih a lang.
YouTube-a inkhel live-a tihchhuaha a lan dan chuan a entute an phusak suau suau hnuah inkhel tihtawp a ni tih a lang a. A hnuah emergency service-ten hlanga mi an zawn lai a lang leh bawk.
Mi thenkhat chuan an kawr hak laia chhuata mi mu zah daih tuma an bei lai a lang bawk.
Rescue Commandos first aid group-a mahni inpea thawk pakhat chuan, “Fan-te khan gate an rawn chim huk a ni,” tiin chanchinbumite hnenah a sawi a. “Thenkhat chu tunnel chhunga thir hnuaiah an la awm a. Thenkhat erawh chhuakin mipui thutna atangin khelmualah an tlan lut,” a ti.
President Bukele chuan ‘tute pawh’ chhui an nih tur thu a sawi a. Team, manager, stadium official, league leh federation thlenga chhui an nih tur thu a sawi.
“A mawhphurtu chu tu pawh ni se hrem a ni ngei ang,” tiin a press secretray chuan Twitter-ah a tar lang.
Thuneitute chuan mi 90 chu damdawi inah lak an ni a, mi eng emaw zat hlauh lutuk avanga buai enkawl ngai an awm bawk tih an sawi.
Civil Protection of El Salvador-a mi, Luis Alonso Amaya chuan mi 500 chuang enkawl ngai leh damdawi ina dah ngai an awm tih a sawi.
Health Minister Francisco Alabi chuan hliam tuarte hi ngaihtuahawm an awm lo va, damdawi ina thi an awm lo niin a sawi bawk.
Salvadoran Soccer Federation chuan Pathiannia khelh tur zawng zawng an thulh nghal tih an puang.