La Liga title an lak hnua an game khelh leh hmasak berah Inrinni zan khan an kawtkai ngei maiah 1-2-in Barcelona an tlawm a, an kuta league title hlan a nih zana an ngam lohte hi Real Sociedad niin, Spanish La Liga match an khelh hnuhnung vawirukah tlawm an nei lo a, table-a palina dinhmun an luah mek sawhnghetin season thara Champions League khelh beiseina an nei sang sawt.
Nou Camp inkhelah hian tan atanga minute nga an khel tling dawn tihah Alexander Sorloth siamsak atangin Mikel Merino chuan Sociedad hmahruaina a thun nawlh a, hei hi first half chhunga goal lut awmchhun a ni zui ta nghe nghe.
Second half-ah pawh mikhual team chefuh hmasa zawkah tang zui lehin, minute 72-ah Merino goal tur chhawpsaktu Sorloth ve thungin a ma pualin goal lawm tur a nei zui ve leh a, phu takin Real Sociedad-in sihnih faiin hma an hruai.
Hun pekbelhah Robert Lewandowski chuan an siphurh pakhat zawk sut then ve bawk mah se Spanish champion hian goal dang an thun belh zo lo a, trophy lawm leh tlawm a inrual!
Karhmasa hmasa leh kartawp khan khelh li hmabak la nei chungin Barcelona kutah La Liga title a lut fel tawh a, Espanyol muala an point thum hlawhchhuah hmangin Real Madrid tana tawh thiang lo dinhmunah an inhlangkai a, kum 2018-19 hnu lama league title an lak leh vawikhatna chiah a ni nghe nghe.
Inrinni khan Sociedad laka an tlawm hnu Nou Camp inkhelh banah home supporter sang tam tak hmuh lai ngeiin La Liga trophy hlan an ni.
Catalan team hian away-a an hnehna sualchhuah nen league table-ah palina luahtu Sociedad hian an hnuai chiaha pangana Villarreal nena an inkar chu point ngaah an dahkir leh ta bawk.