Aizawl : Ni 50 chhung awh Champhai leh Serchhip-a paragliding training neih chu zirtawpni khan khar a ni.
March 29, 2023 atang khan Paragliding pilot training hi Champhai-a neih tan niin, Serchhipah a hmawr bawkna neih a ni. He training hi Mizoram Aerosport Association-in NEC kaltlanga a buatsaih a ni a, Paragliding takeoff site Serchhip Bawngchawm tlangah Superintendent of Police, Serchhip Vanlalnghenga chuan khuallian niin a khar.
Khuallian chuan Serchhipah paragliding tihna hmun tha tak mai a awm leh training hlawhtling taka neih a ni chu thil lawmawm tak a nih thu a sawi a. He event hi khualzin hip nan te, eizawn nan leh intihhlim nan te a tangkai a, pilot zir chhuakte chu an thil zir tangkai taka hmang zui zel tur leh mahni inthunun lamah tan la a, ruihtheih thil leh thil tha lo dangah te fihlim turin kalkhawmte a chah.
Paragliding training-ah hian a tirah mi 45 in bul an tan a, eng emaw harsatna an neih avangin mi pakua in training an zo lo va. Heng trainee te hi Himachal Pradesh, Uttarakhand, Arunachal Pradesh, Punjab, Assam, Manipur, Nagaland, Sikkim, West Bengal, Kerela leh Meghalaya a mi te an ni a. North East atangin Tripura tih loh an tel vek a, trainee 45 zinga 20 chu Mizo an ni.