Aizawl: Sorkar laipuia External Affairs & Culture changtu, Union Minister of State Meenakshi Lekhi chuan Mizoram chu khawchhak lama India kawtchhuah a la nih thuai dawn a, sorkar laipui pawhin a ngaih pawimawh tih Mizoram larsap nen an inkawmnaah a sawi.
Lekhi-i hi Mizoramah zinin nimin tlai khan Larsap Dr Hari Babu Kambhampati Raj Bhavan-ah an inkawm a, KMMTTP, Zokhawthar leh Vangchhia chungchangte an sawi dun a. Union minister chuan Mizoram chu khawchhak lama India kawtchhuah a la nih thuai dawn avangin ngaih pawimawh a ni thu sawiin, hmasawnna ruhrel pawimawh turte pawh la siam belh a ngai dawn nia a hriat thu a sawi a ni.
Union minister chuan nimin tlai vek khan Chief minister Zoramthanga chu a pisaah a kawm bawk a, hemi hnuah Zarkawta State Museum a tlawh bawk.
Mizorama hun a hman zel dan tur ruahmanna awm sa ang chuan vawiinah Mamit district a tlawh dawn a ni.