Aizawl: Mizoram Pradesh Youth Congress Committee (MPYCC) hruaitu hluiten nimin khan hruaitu tharte hnenah mawhphurhna an hlan.
Congress thalai hruaitute mawhphurhna hlanna, Congress Bhawan-a meeting room-a neih hi MPYCC president kal chhuak ta, MPCC treasurer atana ruat thar Dr Lalmalsawma Nghaka’n a kaihruai a. Ram tana thawk tura kal kawng pawimawh chanvo tak chu thalaia an chanvo tha taka hlenchhuah hi a nih thu a sawi a. “Chanvo khelh chhuah tur a ni lo va, a thawha thawhchhuah tur a ni. Mi rintlak leh tlak lo tehna chu a chanvo a hlenchhuah danah a ni. Chhawr leh rintlak ni si lo, nihna chelh duh thin ten pawl kalphung an tibuai fo a. Hmasawnna daltu tam tak an dal thin,” a ti.
Mizoram thalaiten sorkar tha duhin an tuihal nia sawiin Dr Lalmalsawma Nghaka chuan, “Kan chhehvela kan unaute thlamuan ngaiin an rum mek. Hengte tan hian sorkar tha pe turin Mizoram mipuiin Congress party-ah beiseina an nei sang ber,” tia sawiin, an beiseina hlenchhuak turin MPCC President Lalsawta an au niin a sawi.
Congress Thalai president thar Laltawnliana Sailo pawhin Pathianin Mizoram mamawh ang zelin Congress party a hmang thin tih sawiin, “Remna leh muanna kan mamawh a, Congress party chuan thuneihna Mizoram mipuite tan kan kian ngam a. Chenna in nuam leh tha zawk Mizoram mipuiin kan mamawh a, rangva kan pe leh mai a, eizawnna bul an tan theih nan NLUP hmangin bul tanpui an ni leh bawk,” tia sawiin, Mizoram mamawh ang zelin Pathianin Congress party a her remin a buatsaih a, a hmang a. Ram rawngbawl tura Congress party tana Pathian remruatna hi a fel vel vek tih a sawi.
Tar lan tawh thin angin, May 15, 2023 khan MPCC President Lalsawta chuan MPCC treasurer atan MPYCC president ni lai, Dr. Lalmalsawma Nghaka a ruat a. Dr. Lalmalsawma Nghaka hmun ruak luah tur hian MPYCC vice president ni lai, Laltawnliana Sailo, Zarkawt chu ruat a. MPYCC Senior Vice President-ah treasurer ni lai, Ngurdingpuia Pachuau, Zotlang, Aizawl; vice president-ah MPYCC GS tang lai, Lalsanglura Sailo, Chhinga Veng leh treasurer-ah MPYCC GS tang lai, Khawpuimawia, Republic Vengthlang a ruat a ni.