Senior Indian Men’s National Team head coach Igor Stimac chuan la thlitfim leh tur atana player 40 lai national camp-a a hrualte atangin Hero Intercontinental Cup khel tur player 27 awmna squad a puang a, Mizo player pahnih an la tel.
India leilunga international football tournament khelhna tur Bhubaneswar khuaa Blue Tigers camp-a awmte hian ni hnih chhung medical test hautak zet an hmachhawn a, medical leh physical test paltlang mi 27-te hian Hero Intercontinental Cup leh SAFF Championship an khel ang.
India camp hi May ni 16 atanga kalpui tan niin, Mizo hnahthlak pali awmte atangin midfielder pahnih Lallianzuala Chhangte leh Lalengmawia Ralte thlan zingah an tel.
Blue Tigers camp atanga chawlh hmang tura hawtirte zingah hian Vishal Kaith, Manvir Singh, Yasir Mohammad, Glan Martins leh Roshan Singh-te chu hliam vanga thlan loh an ni ve pah bawk.
Camp-a awm zui tura tih player 27-te hian Bhubaneswar khawpuiah training an chhunzawm ang a, he khuaa Hero Intercontinental Cup an khelh zawhah SAFF Championship atana inbuatsaihna chhunzawm turin Bengaluru lamah an insuanlut leh ang.
June thlatir atanga khelh tan tur Hero Intercontinental Cup-ah India hi Qatar, Bangladesh leh Afghanistan-te nen gorp khatah awm hoin, June ni 3 khian an match hmasaberah Fifa ranking lama an aia sang Arab team tumin tournament bul an tan ang.
India 27-member squad:
Goalkeepers: Gurpreet Singh Sandhu, Amrinder Singh and Phurba Lachenpa Tempa.
Defenders: Subhasish Bose, Pritam Kotal, Sandesh Jhingan, Anwar Ali, Akash Mishra, Mehtab Singh and Rahul Bheke.
Midfielders: Liston Colaco, Ashique Kuruniyan, Suresh Singh Wangjam, Rohit Kumar, Udanta Singh, Anirudh Thapa, Naorem Mahesh Singh, Nikhil Poojary, Jeakson Singh, Sahal Abdul Samad, Lalengmawia Ralte, Lallianzuala Chhangte, Rowllin Borges and Nandha Kumar.
Forwards: Sunil Chhetri, Rahim Ali and Ishan Pandita.
Head Coach: Igor Stimac.