India-in a ram chhunga pawisa tlang lian ber, Rs. 2,000 note-te vantlanga pek chhuah tawh loh a tumna kal mekah mipuiin an kawl laite bank-ah an thleng tan mek.
Rs. 2,000 tlang hi kum 2016 khan Indian sorkar hian Rs. 500 leh Rs. 1,000 tlang hman lai a tihthih thut hnuah a tichhuak a ni.
Prime Minister Narendra Modi-a chuan pawisa thianghlim lo (black money) tihtawp vek a tumna atan pawisa tlang lian pahnih hi a tithi thut a, eptute erawh chuan a tum a hlawhchham nia sawiin an sawisel nasa hle thung.
Rs. 2,000 tlang hi September 30 thleng bank-ah thleng theih a ni.
Central bank chuan Zirtawpni kal ta khan Rs. 2,000 tlang hi vantlanga hman leh pek chhuak tihtawp tum a nih thu a sawi a, hman theih reng erawh a la ni tih a sawi.
Reserve Bank of India (RBI) hian heng pawisa tlang hi September 30 hmaa a danga thleng emaw, bank-a dah luh vek emaw a duh tihna a ni a, chu chuan zawi zawiin vantlanga leng a titlem dawn a ni.
Hman erawh a theih chhunzawm reng dawn tho va, tuna thleng theih hun a ralah pawh mipui tan hman a la theih dawn a ni.
Bank-te chu Rs. 2,000 tlang pe chhuak tawh lo tura tih an ni bawk a. Thleng tum an tam avangin thawktu leh counter pawh siam belh rih mai tura tih an ni.
Tun tuma pawisa tlang lian thleng tura tihna hian mi tam tak a tichiai hman a, sorkarin pawisa a tihthih thut ang kha a nih leh mai an hlau.
November 8, 2016 khan Modi-a hian darkar li chiah hun thawm awmin Rs. 500 leh Rs. 1,000 tlang a thih tur thu a puang thut a. Rs. 2,000 tlang tihchhuah nghal a ni thung a, hetianga sorkar chetna hi chanchinbute chuan ‘demonetisation’ tiin an tar lang hlawm.
Hun tiam ral hmaa Rs. 500 leh Rs. 1,000 tlang thleng tumin bank-ah mi tam tak an intlar a. ATP bula intlara din rei lutuk vanga luhaia tlu leh thi hial pawh an awm nia sawi a ni.
Sorkar chuan tuna Rs. 2,000 thleng tura a tih erawh hi chu ‘demonetisation’ ang kha a nih loh thu a sawi thung.