Aizawl: Mi thahnemngaiten ram pum Nehemia Chaw nghei Tawngtai an buatsaih hun hmang ve tura sawm an nih angin nimin khan Congress party chuan chaw nghei tawngtai hun an buatsaih.
Congress Bhawan-a chaw nghei tawngtai buatsaih hi hun hnihah thenin, hun khatna hi MPCC President Lalsawta’n a kaihruai a. Mizoram dinhmun hria a mi thahnemngaiten Pathian lama tan a tulzia leh Pathian hnena fel lohna leh dik lohnate thupha chawia hun hman an huaihawt chu thil lawmawm leh tul tak a nih thu a sawiin, “A taka danglamna thlen thei tura rilru leh thinlunga Pathian lam hawi a tul,” a ti.
Sorkar tha siam tur chuan Pathian a hmasa bera dah zel a tul tih sawiin Lalsawta hian, “Kan thiltih tehna hmanrua atan pawh, ‘Bible-in engtin nge a tih?’ tih a ni zel tur a ni,” tiin, Pathian nen chuan ram rorelna tha hi Mizoram mipuite an pe thei a, incheina atan leh vote zawnna atana Pathian hming lamtu chuan Pathian leh ram mipui pawi a sawi tih a sawi.
Hun hnihna kaihruaitu, MPCC Vice President Lal Thanzara pawhin tawngtai thiltihtheihzia hre lo tan ringtu nih a famkim lo tih a sawi a. Thuthlung Hlui atanga Thuthlung Thara pawimawh ber chang phak chu tawngtai thiltihtheihna a ni tih sawiin, “Tih tak taka Pathian autute chu chhanin an awm thin a, kan rama buaina leh harsatna hrang hrang thlengte hi tihtak zeta ngaihdam dila Pathian hnena kan thlen chuan damna kan chang thei a ni,” a ti a. A langa mawi ni loa ram leh hnam siam that duhna tak tak nena tawngtaina nasa zawka neih fo a tul thu a sawi bawk.
He hunah hian tawngtai thupui siam sa, ‘Zofaten Pathian thu kan awih lohna leh a hming kan tihchhiatna sual thupa chawina leh ngaihdam dil tawngtaina’ tih bakah kal khawmte atangin tawngtai thupui thawh leh rilru sawina hun hman a ni bawk.