Aizawl: Deputy Chief Minister Tawnluia’n nimin khan Chaltlang Sports Multipurpose sakna tur leh Chaltlang Tourist Lodge-a Aizawl Tourism Centre tihchangtlunna tur lungphum a phum.
Lungphum phumna inkhawmah thu sawiin Tawnluia chuan tourist lodge chu khualzin thlenna piah lamah Aizawl khawpuia puipunna leh tangkai taka hman theih tura ruahmanna siam belh chu sorkar ngaih pawimawh a nih thu leh thalaite tan sports multipurpose hall dang siamsak a ni tur chu lawmawm a tih thu a sawi.
UD&PA changtu minister ni bawk chuan India ramah Smart City Project chu kum 2024 thleng pawh sei a nih thu a sawi a, hemi chhung hian project pahnih hi zawh tum a nih thu a sawi bawk.
Chaltlang Tourist Lodge-a lungphum phumna inkhawmah AMC Mayor Lalrinenga Sailo leh UD&PA Secretary Lalmalsawma Pachuau bakah C.C. Lalchhuangkima, Chief Executive Officer leh C.Lalpiangthara, Local Council Chairman, Chaltlang ten thu an sawi bawk.
Chaltlang Sports Multipurpose Hall hi Rs vbc 13.52 senga sak tur niin, a satu tur hi H.Sanga, Vaivakawn Road, Chanmari, Aizawl a ni a. November 15, 2022 khan contract agreement siam a ni a. Basketball court, table tennis, boxing ring, gym, parking, dormitory a awm dawn a. Terrace level-ah hian lirthei ke li nei 10 lenna tur leh building chhawng khatnaah lirthei ke hnih nei 64 lenna tur ruahman a ni.
Aizawl Tourism Centre tihchangtlunna atan Rs vbc 18.11 ruahman a ni a, a satu tur hi M/S Allied Concern, Dawrpui an ni a. February 10, 2023 khan contract agreement siam a ni a, May 9, 2023 khan hna bul tan niin June 30, 2024-a sak zawh tura beisei a ni.