Aizawl : Ministry of Power Secretary Alok Kumar chuan Inrinni tlai khan Mizoram larsap Dr Hari babu Kambhampati chu a chenna inah kawmin, Mizorama luiluang hmanga kawlphetha siam chungchang leh a kaihhnawih thil pawimawh a sawipui.
An inkawmnaah hian Larsap Dr Hari Babu Kambhampati chuan Mizoramin kawlphetha tam tham tak siam theihna tur lui luang nei mah se, sum lamah harsatna a tawh avangin kawng dang dapin Union Power Minister te pawh a lo hmuh thin thu te a sawi a. Power siam chhuah kawngah hna thawh theihna a nih dawn chuan Central PSU te pawh sawm luh mai a finthlak thu te leh thil tul dang te pawh State Power Minister leh official te a sawi pui fo tawh tih a sawi bawk.
Larsap chuan Alok Kumar chu eng emaw ti kawng tala Mizoramin kawlphetha siam chhuah belh dan kawng zawnpui turin a sawm a. Mizoramin kawlphetha hman tur kham khawp a neih hunah chuan thil siam chhuahna hmun tam tak a awm belh tur thu leh hemi hmang hian state revenue pawh a pung dawn niin a sawi.
Alok Kumar chuan Mizoram sorkara P&E dept-a Commissioner & Secretary hovin Engineer-in-Chief leh a hnuaia engineer te nen inkawmna eng atangin Mizoramah lawlphetha siamchhuah belhna turin Hydroelectricity Power Plant lian deuh din tura kawng zawn a ni dawn tih a sawi a. Central Power Secretary chuan Hydel Plant te deuh din chu thil tih chi niin a hriat loh thu a sawi a. Hydel Project te tham deuh Mw 200 chin tal loah chuan eng chhit man, unit khatah cheng tam tak chawi a ngai tur chu thil tha lo tak a nih thu a sawi a. Hydro Power plant din a nih dawn Mw 200 chunglam an en a tul a. Hetiang Mw pechhuak chinah chuan Unit khat hralhna man pawh a chawi tu tan a zia awm deuh niin a sawi.